Qylmystyq kodekske engen jańa bap: beınebaqylaý kamerasyn búldirgenderge jaza kúsheıdi

ASTANA. KAZINFORM – 2024 jyldyń shilde aıynan bastap Qazaqstan Respýblıkasynyń Qylmystyq kodeksine 428-1-bap engizildi. Jańa norma túzeý mekemelerindegi beınebaqylaý kameralaryn qasaqana isten shyǵarǵany nemese zaqymdaǵany úshin qylmystyq jaýapkershilik qarastyrady. Bul týraly Polisia.kz habarlady.

Atalǵan ózgeris elimizdegi qylmystyq-atqarý júıesi mekemelerinde táýlik boıy beınebaqylaý júıesiniń keńinen engizilýimen jáne bul kameralarǵa ádeıi zaqym keltirý jaǵdaılarynyń jıileýimen baılanysty qabyldanǵan.

Jańa bap kúshine engen alǵashqy jyldyń ishinde osyndaı 70-ten astam quqyqbuzýshylyq tirkeldi. Sonyń ishinde 35 sottalǵanǵa qosymsha jaza merzimi taǵaıyndalyp, keltirilgen shyǵyn azamattyq tártippen óndirýge sheshim shyǵaryldy.

Máselen, Shymkent qalasyndaǵy №55 mekemesinde 13 sottalǵan adam beınebaqylaý júıesin ádeıi buzǵany úshin árqaısysy qosymsha 6 jyl merzimge sottalǵan.

Qazirgi tańda elimizdegi 78 túzeý mekemesinde 43 myńnan astam beınebaqylaý kamerasy jumys isteıdi. Bul júıeler naqty ýaqyt rejıminde QAJ komıtetine, Іshki ister mınıstrligine jáne prokýratýra organdaryna tikeleı kórsetilim júrgizedi.

Beınebaqylaý júıesi:

• sottalǵandar men qyzmetkerler arasyndaǵy tártipti arttyrýǵa,

• quqyqbuzýshylyqtardy jedel anyqtaýǵa,

• adam quqyqtarynyń saqtalýyn baqylaýǵa múmkindik beredi.

QAJ komıtetiniń málimetinshe, QK-tiń 428-1-baby boıynsha quqyqbuzýshylyqtar sany azaıa bastaǵan. Bul beınebaqylaý júıesiniń tıimdiligin kórsetip qana qoımaı, qymbat tehnıkalyq quraldardyń saqtalýyna jáne bıýdjet qarajatyn únemdeýge de oń yqpal etip otyr.

Aıta keteıik, Aqtóbede jazasyn óteýshi túrme ishindegi beınebaqylaý kamerasyn syndyryp, qaıta sottaldy.