Qylmystyq kodekste kásipkerlerdiń quqyǵyn qorǵaý kúsheıtilmek
ASTANA. KAZINFORM – Májiliste «QR keıbir zańnamalyq aktilerine Qylmystyq, Qylmystyq-protsestik jáne Qylmystyq-atqarý kodeksterin ońtaılandyrý máseleleri boıynsha ózgerister men tolyqtyrýlar engizý týraly» zań jobasy birinshi oqylymda talqylanyp jatyr.
Ádilet mınıstri Azamat Esqaraev zań jobasyndaǵy ózgeristerdiń bir bólimi azamattar men kásipkerlerdiń quqyqtaryn qorǵaýdy kúsheıtýge baǵyttalǵanyn aıtty.
«Onda azamattardy qylmystyq qýdalaý sheńberine negizsiz tartýdy boldyrmaý; buzýshylyqtardy jáne sotqa deıingi tergep-tekserýdiń tolyqtyǵyn qamtamasyz etý úshin isti «pysyqtaýǵa» prokýrorǵa qaıtarý múmkindigin boldyrmaý; kásipkerlik sýbektilerin revızııalaý jáne tekserý isin júrgizýdi prokýrormen mindetti túrde kelisýdi belgileý; tintý, jeke tintý jáne tárkileý boıynsha sanktsııanyń 10 kúndik merzimin belgileý sharalary qarastyrylǵan», - dedi Ádilet mınıstri Májilistiń jalpy otyrysynda.
Sonymen birge, buryn «qorǵalýǵa quqyǵy bar kýá» retinde bolǵan adamnyń aıǵaqtaryn dálel retinde paıdalanýǵa tyıym salý usynylǵan.
«Adam ólimine baılanysty emes asa aýyr qylmystardyń jekelegen túrleri boıynsha kináni moıyndaý týraly mámile nysanynda protsestik kelisim jasasý múmkindigin berý; qorǵalýǵa quqyǵy bar kýáni saraptamaǵa bastamashylyq jasaýǵa quqyǵy bar adamdar sheńberine biriktirý; jazanyń mólsherles bolýyn, sondaı-aq bas bostandyǵynan aıyrýdyń balamasyn qamtamasyz etý úshin keıbir qylmystyq quqyqbuzýshylyqtar boıynsha eselengen aıyppuldardy engizý kózdeledi», - dedi A. Esqaraev.
Májilis depýtaty Nurtaı Sabılıanov qylmystyq isterdi tergeý organdary táýelsiz zertteýlerde rastalmaǵan málimetterdi kórsetip, raport berý arqyly qylmystyq is qozǵaıtynyn, keıde bul azamattardyń quqyǵyn buzýǵa ákeletinin atap ótti.
«Sotqa deıingi tergep-tekserýdiń biryńǵaı tiziliminde qylmystyq isterdi negizsiz tirkeýdi qalaı alyp tastaýǵa bolady, qalaı joqqa shyǵarylady? Azamattardyń quqyǵyn qorǵaý úshin qandaı pármendi tetikter kózdeledi?», - dep surady depýtat.
«Rasynda da bul kókeıkesti másele bolyp tur. Sondyqtan biz quqyq qorǵaý organdarynyń baıanaty negizinde eger qylmystyq árekettiń nátıjesinde bir ekonomıkalyq shyǵyn keltirilmese, dáleldeıtin qujattar bolmasa, onda osy baıanat negizinde qylmystyq isti qozǵaýǵa ruqsat berilmeıdi degen naqty shekteý qoıylyp otyr. Bizdiń paıymdaýymyzsha bul Sotqa deıingi tergeýlerdiń biryńǵaı reestrine baıanatty tirkeýge jol bermeıdi jáne azamattardyń quqyǵy men bostandyǵyn qorǵaýǵa kómektesedi», - dep jaýap berdi mınıstr.
Zań jobasy áli talqylanyp jatyr.
