Qylmys sany 11%-ǵa azaıdy – QR ІІM alqa májilisi

ASTANA. KAZINFORM - Qazaqstan Respýblıkasy Іshki ister mınıstrliginde ishki ister organdarynyń ortalyq apparaty qyzmetteri men aýmaqtyq bólinisterdiń basshylarynyń qatysýymen keńeıtilgen alqa otyrysy ótti, dep habarlaıdy Polisia.kz.

Otyrys barysynda bıylǵy alǵashqy jartyjyldyqtaǵy jedel qyzmet qorytyndylary shyǵarylyp, el Prezıdentiniń quqyq qorǵaý organdarynyń keńeıtilgen alqa otyrysynda bergen tapsyrmalaryn iske asyrý aıasynda basym mindetter aıqyndaldy.

Іshki ister mınıstri Erjan Sadenovtiń aıtýynsha, qylmyspen kúreste oń dınamıka baıqalady. Tirkelgen qylmystardyń jalpy sany 11%-ǵa tómendegen. Adam óltirý, aýyr dene jaraqatyn keltirý, zorlaý, qaraqshylyq, tonaý, buzaqylyq, urlyq, mal urlyǵy jáne basqa da qylmystardyń sany azaıǵan.

Sondaı-aq qoǵamdyq oryndar men kóshelerdegi quqyqbuzýshylyqtar deńgeıiniń tómendegen. Oń nátıjelermen qatar, otyrysqa qatysýshylar bólinisterdiń qyzmetindegi kemshilikterdi qarastyryp, olardy joıý joldaryn talqylady. Basshylar men jeke quram aldyna «Zań men Tártip» qaǵıdatyn ilgeriletý, quqyqbuzýshylyqtardyń aldyn alýdy kúsheıtý, qylmystyq-atqarý júıesin jetildirý, polıtsııa jumysynyń servıstik modelin engizý jáne kadrlyq áleýetti nyǵaıtý boıynsha naqty mindetter qoıyldy.

Jergilikti atqarýshy organdarmen ózara is-qımyl máselelerine erekshe nazar aýdaryldy.

Atap aıtqanda, bólinisterdiń materıaldyq-tehnıkalyq jaraqtandyrylýyn arttyrý, «Taza Qazaqstan» respýblıkalyq aktsııasyn sapaly ótkizý, eldegi týrısterdiń qaýipsizdigin qamtamasyz etý, sondaı-aq qoǵamdyq tártip pen sotqa deıingi tergeý salasynda tsıfrlyq sheshimderdi odan ári damytý máseleleri qaraldy.

Qazaqstan polıtsııasy kúnine oraı ótken alqa otyrysy aıasynda qyzmette joǵary kórsetkishterge qol jetkizgen ishki ister organdarynyń úzdik qyzmetkerleri marapattaldy.

Osyǵan deıin Prezıdent qoǵamdyq tártipke úles qosqandardy marapattaǵan bolatyn.