Qylmys qurbany bolsańyz, qandaı jaǵdaıda memleket ótemaqy tóleıdi
ASTANA. KAZINFORM — Elimizde qylmystan zardap shekkenderge memleketten 50 AEK-ke deıin tólem qarastyrylǵan, dep habarlaıdy Bas prokýratýranyń baspasóz qyzmeti.
Qazaqstanda aýyr quqyq buzýshylyqtardan zardap shekken azamattarǵa bastapqy qarjylyq qoldaý kórsetýge baǵyttalǵan «Jábirlenýshilerge ótemaqy qory týraly» zań qoldanylady.
Bul tólem — memleket tarapynan kórsetiletin materıaldyq kómek. Ony alý úshin kináli adamnyń anyqtalýy, jaýapqa tartylýy nemese keltirilgen zalaldy óteýi mindetti emes.
Kimder ótemaqy ala alady?
Zań boıynsha ótemaqy alýǵa quqyǵy bar azamattardyń sanatyna:
- jynystyq zorlyq-zombylyqtan zardap shekken kámeletke tolmaǵandar;
- adam saýdasynyń qurbandary;
- azaptaýdan zardap shekkender;
- qylmys saldarynan densaýlyǵyna aýyr zııan keltirilgen adamdar;
- qylmys saldarynan AITV/JITS juqtyrǵan adamdar jatady.
Sondaı-aq jábirlenýshi qaıtys bolǵan jaǵdaıda onyń zańdy ókilderi nemese jaqyn týystary ótemaqy alýǵa quqyly. Naqty sanattar men talaptar zańda kórsetilgen.
Qansha aqsha tólenedi?
Ótemaqy bir ret tólenedi. Onyń mólsheri aılyq eseptik kórsetkishke (AEK) baılanysty eseptelip, qylmys sanatyna qaraı 30-dan 50 AEK-ke deıin bolady.
Ótinishti qashan berýge bolady?
Jábirlenýshi ótemaqy alý úshin ózin jábirlenýshi dep tanyǵan kúnnen bastap úsh jyl ishinde ótinish bere alady.
Qylmystyq qýdalaý organy adamdy jábirlenýshi dep tanyǵan kezde oǵan Qordan ótemaqy alý quqyǵyn jáne ótinish berý tártibin jazbasha túrde túsindirýge mindetti.
Ótinishti qaıda berý kerek?
Bank shoty kórsetilgen ótinishti qylmystyq isti júrgizip jatqan tergeýshige nemese anyqtaýshyǵa berýge bolady.
Qajetti protsestik qujattar paketi qalyptastyrylǵannan keıin Qazynashylyq tólemdi qolma-qol aqshasyz tártippen júzege asyrady.
Ótemaqy alǵannan keıin zalaldy óndirip alýǵa bola ma?
Iá. Memlekettik ótemaqyny alý azamattyń kináli adamnan sot tártibimen materıaldyq jáne moraldyq zııandy tolyq óteýdi talap etý quqyǵyn shektemeıdi.
Qosymsha aqparatty qaıdan alýǵa bolady?
Tolyq túsinikteme alý úshin azamattar qylmystyq is júrgizilip jatqan jerdegi quqyq qorǵaý organdaryna júgine alady.
Osyǵan deıin Semeıde 19 jastaǵy qyzdyń ólimine qatysty tergeý júrgizilip jatqanyn jazǵanbyz. Polıtsııanyń málimetinshe, kúdikti izin sýytpaı ustaldy. Ol 24 jastaǵy jergilikti turǵyn bolyp shyqty.
