Qylmys quramy joq: Qonaevta kámeletke tolmaǵan qyzdy zorlady dep aıyptalǵan polıtseılerge qatysty is toqtatyldy

QONAEV. KAZINFORM – Almaty oblysynda 14 jastaǵy oqýshy qyzdy zorlady dep aıyptalǵan polıtseılerge qatysty qylmystyq is toqtatyldy.

«2024 jyldyń 12 tamyzynda QR Qylmys kodeksiniń 35-baby 1-bóliginiń 2-tarmaǵy negizinde qylmys quramynyń bolmaýyna baılanysty is toqtatyldy. Almaty oblystyq prokýratýrasy qabyldanǵan sheshimdi maquldady», - dep habarlady oblystyq Polıtsııa departamentinen.

Eske salaıyq, bul aqparat byltyr qarasha aıynda áleýmettik jelide taraǵan bolatyn. 

«Anonımdi derekkózdiń málimetinshe, Qonaev qalasynda eki polıtsııa qyzmetkeri qyzmettik jaǵdaıyn paıdalanyp, 14 jasar oqýshy qyzben jynystyq qatynasqa túsip, ony vıdeoǵa túsirgen (vıdeony qazir qyzmetkerlerdiń ózderi taratyp jatyr). Bizge belgilisi, onyń biri kámeletke tolmaǵandar jónindegi ınspektor, ekinshisi — ǵımaratty kúzetetin polıtsııa qyzmetkeri, qazir ekeýi de qamaýǵa alynyp,jumystan bosatylǵan», — dep jazylǵan qordyń Instagram paraqshasynda.

Keıin, Almaty oblysynyń polıtsııa departamenti eki kúdiktiniń qamaýǵa alynǵanyn habarlady. Tártip saqshylary qylmys jasaǵanǵa deıin jumystaǵy kemshilikteri úshin óz erkimen jumystan bosatý jóninde ótinish jazǵany belgili boldy.

Alaıda ol kezde jumystan bosatý týraly buıryq shyqpaǵan edi. Sol sebepti qylmys jasaǵan kezde olar polıtsııa qyzmetkerleri bolyp sanalady.