Qylmys kóbeıgen soń Shvetsııa kámeletke tolmaǵandarǵa qatań jaza engizedi

ASTANA. KAZINFORM — Qylmys jasaǵan 13–14 jastaǵy jasóspirimder 2026 jyldyń shildesinen bastap kámeletke tolmaǵandarǵa arnalǵan ustaý ortalyqtaryna qamalady, dep habarlaıdy DW.

Buǵan deıin úkimet ulttyq túrme basqarmasyna aýyr qylmys jasaǵan 15–17 jastaǵy jasóspirimderge arnalǵan arnaıy bólimsheler qurýdy tapsyrǵan.

Mundaı sharalar Shvetsııa aýmaǵynda belsendi qylmystyq toptarmen kúres maqsatynda qabyldanyp otyr. Bul toptar aýyr qylmysqa, sonyń ishinde kisi óltirýge, kámeletke tolmaǵandardy tartady. Qazirgi ýaqytta elde 13 jastaǵy balalar qylmystyq jaýapkershilikke tartylmaıdy.

Ádilet mınıstri Gýnnar Stremmerdiń aıtýynsha, asa aýyr qylmystar úshin qylmystyq jaýapkershilik jasyn tómendetý qoǵamdy qorǵaý úshin ǵana emes, sonymen qatar balalardyń qylmystyq joldan ketýine kómektesý úshin qajet.

Onyń sózinshe, bastapqy kezeńde alty qamaý ortalyǵynda 13-ten 17 jasqa deıingi quqyq buzýshylarǵa arnalǵan 100-den 150-ge deıin oryn ashylady. Uldar men qyzdar, sondaı-aq kishi jáne úlken jastaǵy jasóspirimder bólek sektsııalarda ustalady.

— 13–14 jastaǵy jasóspirimder avtomatty qarýmen kóshede júrgende, qoǵam buǵan barynsha qatań áreket etýi tıis, — dedi Shvetsııa parlamentiniń ádilet komıtetiniń tóraıymy Henrıka Vınge.

Buǵan deıin Shvetsııa premer-mınıstri elde qylmystyq jaýapkershilik jasyn tómendetý josparlanyp otyrǵanyn málimdegen bolatyn.