Qylmys áleminiń serkesi qyrǵyz Qamshy Kólbaevtyń Qazaqstanda aktıvteri bar ma – Jamaýbaev jaýaby

Premer-Mınıstrdiń orynbasary – Qarjy mınıstri Erulan Jamaýbaev qylmys áleminiń serkesi qyrǵyz Qamshy Kólbaevtyń Qazaqstanda aktıvteriniń bolý jáne qyrǵyz tarapynyń ony qaıtarý týraly suranystyń jasalý múmkindigine qatysty saýalǵa jaýap berdi, dep habarlaıdy Kazinform agenttiginiń tilshisi.

«Bul jańadan shyqqan aqparat. Sondyqtan ázirshe qandaı da bir suranys kelip túsken joq. Mundaı jumysty biz ózimiz de júrgizip jatyrmyz. Keshe kapıtaldy qaıtarý jónindegi komıssııanyń birinshi otyrysy ótti. Taıaý ýaqytta ekinshi otyrys ótedi. Sizder atalǵan komıssııa jumysynyń nátıjesi jaıly biletin bolasyzdar. Qyrǵyz áriptesterimizge qatysty aıtar bolsam, ázirshe qyrǵyz áriptesterimizden qandaı da bir suranys kelmedi. Múmkin quqyq qorǵaý qurylymdarynyń belgili bir arnalary arqyly túsken de shyǵar. Biraq, ol maǵan belgisiz», - dedi Erulan Jamaýbaev Úkimet otyrysynan keıin BAQ ókilderiniń saýalyna oraı.

Onyń atap ótýinshe, Qamshy Kólbaevtyń Qazaqstan aktıvteriniń bar-joǵy jaıly aıtý qıyn.

«Atalǵan tulǵanyń Qazaqstanda jalpy múlki nemese qandaı da bir qarajaty bar ekendigin aıtý qıyn. Taǵy da atamyn, aqparat endi ǵana tústi. Sondyqtan olardyń tarapynan (qyrǵyz tarapynan) suranystyń túsýine qaraı qarastyratyn bolamyz», - dedi ol.

Aıta keteıik, 4 qazanda Bishkekte arnaıy operatsııa kezinde qylmys álemniń serkesi Qamshy Kólbaev qaza tapty.