Qylmys 9%-ǵa tómendedi: ІІM jańa mindetterdi aıqyndady
ASTANA. KAZINFORM — Іshki ister mınıstrliginde ótken keńeıtilgen alqa otyrysynda 2026 jyldyń birinshi toqsanyndaǵy jedel qyzmet qorytyndysy shyǵaryldy. Bul týraly Polisia.kz jazdy.
Jumystyń negizgi baǵyty retinde konstıtýtsııalyq deńgeıde bekitilgen «Zań men Tártip» qaǵıdaty aıqyndaldy. Memleket basshysynyń sózderine súıene otyryp, Іshki ister mınıstri Erjan Sadenov Zań men Tártip ıdeologııasy qoǵamnyń barlyq salasynda negizgi basymdyqqa aınalýy tıis ekenin jetkizdi. Bul quqyqtyq sanany nyǵaıtýdy jáne zańdy buljytpaı saqtaýdy talap etedi.
Atalǵan kezeńde ótken jyldyń osy kezeńimen salystyrǵanda qylmys deńgeıi 9%-ǵa nemese 2150 qylmysqa azaıǵan. Qylmystyń tómendeýi barlyq negizgi sanattar boıynsha baıqalady. Buryn sotty bolǵandarmen, kámeletke tolmaǵandarmen, mas kúıinde, qoǵamdyq oryndarda jáne turmysta jasalatyn quqyqbuzýshylyqtar sany tómendegen. Sonymen qatar barlyq sanattaǵy qylmystardyń ashylý deńgeıi artqan.
— Internet-alaıaqtyq faktileri de azaıǵan. Qylmystyń bul túri boıynsha ashylý kórsetkishi artty. Akkaýnttardy buzý, krıptovalıýtalar, onlaın-qaryzdar jáne jalǵan ınternet-resýrstarǵa baılanysty alaıaqtyqtar sany qysqarǵan. 3,6 mln astam ákimshilik quqyqbuzýshylyqtyń joly kesildi, bul olardyń aýyr qylmystarǵa ulasýynyń aldyn alýǵa múmkindik berdi. «Taza Qazaqstan» qaǵıdaty aıasynda 722 myńnan astam quqyq buzýshylyq anyqtalyp, 3 myńnan astam zańsyz qoqys oryndary joıyldy, — delingen habarlamada.
Sondaı-aq barlyq baǵyttar boıynsha jasandy ıntellekt elementterin engizý, tsıfrlyq quraldardy odan ári damytý qajettigi atap ótildi. Burynǵy jyldary jasalǵan qylmystardy qosa alǵanda, jalpy qylmystardy ashý deńgeıin arttyrý, sondaı-aq sotqa deıingi tergep-tekserý sapasyn jaqsartý jáne jábirlenýshilerge keltirilgen shyǵyndy óteýdi qamtamasyz etý mindeti qoıyldy.
Azamattardyń quqyqtary men zańdy múddelerin qorǵaýǵa, qylmystyq isterdi tergeýde sozbalańdyqqa jol bermeýge, halyqtyń barlyq ótinishteri men shaǵymdaryna jedel áreket etýge erekshe nazar aýdaryldy. Aýyl turǵyndary úshin negizgi tabys kózi bolyp tabylatyn mal sharýashylyǵyn saqtaý turǵysynan mal urlyǵyna qarsy kúresti kúsheıtý tapsyryldy.
Sondaı-aq mınıstr kóshi-qon baqylaýyn, qylmystyq-atqarý júıesin, vedomstvolyq bilim berýdi damytý jáne Ulttyq ulannyń áleýetin arttyrý baǵytyndaǵy jumysty kúsheıtýdi talap etti. Odan bólek, qyzmettik-áskerı tártipti nyǵaıtý, jaýyngerlik jáne dene daıyndyǵy deńgeıin arttyrý basym baǵyt retinde aıqyndaldy. Jeke quramǵa baqylaýdy kúsheıtip, árbir quqyqbuzýshylyq faktisine prıntsıpti baǵa berý jáne jaýapkershilikten bultartpaýdy qamtamasyz etý tapsyryldy.
Otyrysta aýmaqtyq bólinister men ortalyq apparat qyzmetteri basshylarynyń esepteri tyńdaldy. Anyqtalǵan kemshilikter kórsetilip, olardy jedel joıý jáne eldegi quqyqtyq tártipti nyǵaıtý, azamattardyń qaýipsizdigin qamtamasyz etý, profılaktıkalyq jumystyń tıimdiligin arttyrý boıynsha naqty sharalar qabyldaý mindeti qoıyldy. Qyzmettik tártiptiń jaı-kúıi men atqarylǵan jumystardyń nátıjeleri úshin basshylardyń jeke jaýapkershiligi erekshe atap ótildi.
Aıta keteıik, buǵan deıin ІІM-de ARLAN sport klýby qurylatynyn jazdyq.