Kılıan Mbappe resmı túrde «Real Madrıd» oıynshysy atandy
ASTANA. KAZINFORM - Frantsııalyq fýtbolshy Kılıan Mbappe resmı túrde ıspanııalyq «Real Madrıd» komandasynyń oıynshysy boldy. Búgin «Santıago Bernabeý» stadıonynda fýtbolshyny saltanatty túrde tanystyrý rásimi ótti. Atalǵan sharany tamashalaýǵa 80 myńnan astam jankúıer múmkindik aldy.
Buǵan deıin 25 jastaǵy oıynshy Frantsııanyń «Parı Sen-Jermen» klýbynda óner kórsetti. 2024 jyldyń mamyr aıynda ol komandadan ketetininin resmı túrde málimdedi.
Saltanatty shara kezinde Mbappe armanyndaǵy klýbtyń bir múshesi bolǵanyna qýanyshty ekenin jetkizdi.
«Men baqyttymyn. Armanymnyń oryndalǵanyna qýanyshtymyn. Ómirimdi osy klýbqa arnaımyn. Hala Madrid!», - dedi Kılıan.
Tanymal fýtbolshy úlken fýtboldaǵy alǵashqy qadamyn 2015 jyly Frantsııanyń «Monako» klýbynda bastady. 2017 jyldan beri «Parı Sen-Jermen» sapynda 256 gol soqty. Sońǵy maýsymda ol frantsııalyq komandada 48 oıynda 44 gol soǵyp, 10 nátıjeli pas berdi.
Ol «Real Madrıd» klýbyna erkin agent retinde aýysty. Jańa komandada 9 nómirmen óner kórsetetin Kılıan Mbappe klýbpen 2029 jylǵa deıin kelisimshartqa otyrdy.
Frantsııalyq shabýylshy koroldik klýb sapynda jylyna 54 mln eýro tabys tabady. Fýtbolshynyń transferlik quny 180 mıllıon eýroǵa baǵalanyp otyr.
