Kılıan Mbappe álem chempıonattarynda 9 gol soqqan alǵashqy jas oıynshy atandy

ASTANA. QazAqparat – Frantsııa quramasynyń shabýylshysy Kılıan Mbappe álem chempıonattarynda 9 gol soqqan birinshi jas oıynshy atandy, dep habarlaıdy QazAqparat tilshisi.

Budan tórt jyl buryn Reseıde ótken chempıonatta K.Mbappe qarsylastar qaqpasyna 4 gol soǵyp, Frantsııa jeńimpaz bolǵan birinshilik sońynda «Eń úzdik jas oıynshy» atanǵan edi.

K.Mbappeniń bıylǵy qarqyny odan da joǵary. Toptyq básekede ol úsh goldyń avtory atansa, búgin Polsha qaqpasyna taǵy eki dop engizdi.

Osylaısha, K.Mbappe 24 jasqa jetpeı-aq álem chempıonattarynda 9 gol soqqan alǵashqy oıynshy atandy.

Eske sala keteıik, budan buryn Messı bastaǵan Argentınanyń shırek fınalǵa shyqqanyn jazǵan bolatynbyz.

Messı «Úzdik oıynshy» ataǵyn segizinshi ret jeńip alyp, rekord ornatty.

Olıve Jırý Frantsııa quramasynyń úzdik mergen oıynshysy atandy. Sondaı-aq búgin Polshany utqan Frantsııa shırek fınalǵa joldama aldy.