Kilemge qaıta oralǵan Almat Kebispaev spartakıada chempıony atandy

ASTANA. QazAqparat – Almaty qalasyndaǵy Balýan Sholaq atyndaǵy sport saraıynda grek-rım kúresinen Qazaqstannyń VI jazǵy spartakıadasy márege jetti, dep habarlaıdy QazAqparat tilshisi.

Bul jarysta álem chempıonatynyń bes dúrkin júldegeri, 35 jastaǵy Almat Kebispaevtyń kilemge qaıta oralýy jankúıerlerdiń nazaryn erekshe aýdardy.

Qaraǵandy oblysynyń atynan kúresken Almat Kebispaev 67 kelige deıingi salmaqta fınalǵa qınalmaı shyqty. Sońǵy básekede shyǵysqazaqstandyq Mereı Bekenovti 5:2 esebimen utty.

Osylaısha, A.Kebispaev Qaraǵandy oblysyna altyn áperdi.

Sondaı-aq búgin Abaı oblysynyń ókili Aıbek Sabyrbekov (60 kg), almatylyq Azat Sadyqov (77 kg), taǵy bir abaılyq Nursultan Tursynov (87 kg) jáne shymkenttik Álimhan Syzdyqov (130 kg) chempıon atandy.

Keshe óz salmaq dárejeleri boıynsha Marlan Muqashev (Astana, 55 kg), Muhammedálı Mamyrbek (Shymkent, 63 kg), Ibragım Magomadov (Qaraǵandy, 72 kg), Islam Evolev (SQO, 82 kg), Oljas Syrlybaı (Qyzylorda, 97 kg) úzdik shyqty.

QR VI jazǵy spartakıadasy endi erkin jáne áıelder kúresi boıynsha jalǵasatyn bolady.