Ekologııa mınıstrligi kıikterdiń qyrylýyna qatysty túsinik berdi

ASTANA. KAZINFORM — Ekologııa jáne tabıǵı resýrstar mınıstrligi kıikterdiń qyrylyp jatqan oqıǵasyna qatysty túsinik berdi. 

Jelide Qaraǵandy jáne Ulytaý oblystaryndaǵy qys mezgilindegi kıik ushalary beınelengen jazba taralyp jatyr.

— Mundaı jaǵdaı birqatar basqa aımaqta da tirkelgen. Kóbinese Ulytaý, Qaraǵandy, Qyzylorda, Atyraý, Batys Qazaqstan oblystarynyń tabıǵı mekendeý oryndarynda tabyldy. Kıiktiń bıologııasyn eskersek, bul tabıǵı jaǵdaımen baılanysty. Óńirlerde vedomstvoaralyq ózara is-qımyldyń bekitilgen algorıtmderi bar, jumys jedel shtabtar arqyly júzege asyrylady. Algorıtm aıasynda ushalar veterınarııalyq zańnamaǵa sáıkes joıylady. Muny Orman sharýashylyǵy jáne janýarlar dúnıesi komıtetiniń aýmaqtyq jáne vedomstvolyq baǵynysty bólimsheleri ákimdiktermen, veterınarııalyq qyzmetpen, polıtsııa jáne TJM qyzmetkerlerimen birlesip júrgizedi. Atalǵan jumystarǵa barlyǵy 150-den astam adam, 51 tehnıka jumyldyryldy, — delingen habarlamada.

Bıylǵy jyldyń basynan bastap 5,2 myńnan astam ólekse joıyldy.

— Qalypty jaǵdaıda kıikterdiń jyl saıynǵy tabıǵı ólimi jalpy sanynyń shamamen 20% bolady, al atalyqtarynyń 50%-y ólýi múmkin. Kıiktiń - ómir súrý ýaqyty qysqa, kóbeıýi jyldam dala janýary. Qatal qysta kıik sany 40-50%-ǵa deıin azaıýy múmkin, ásirese qystyń aldynda kóktemgi-jazǵy qurǵaqshylyq bolǵan jaǵdaıda. Qys mezgilinde qardyń qalyń túsýine oraı, azyq qorynyń azaıýyna baılanysty janýarlar denesindegi maı qoryn joǵaltady. Qazaqstannyń shóldi men jartylaı shóldi aýmaqtarynda mundaı tabıǵı qubylystar jıi baıqalady, sáıkesinshe bul keıbir álsiregen kıikterdiń ólimine ákeledi, — dedi Zoologııa ınstıtýtynyń terıologııa zerthanasynyń meńgerýshisi Alekseı Grachev.

Buǵan deıin habarlanǵandaı, Qazaqstanda kıikterdiń jalpy sany 4,1 mıllıon bas, QazKSR kezeńindegi eń kóp sany 1,2 mıllıon bas bolǵan.

Aıta ketelik Ulytaýda kıikter qyrylyp jatqanyn, sondaı-aq Ekologııa mınıstrligi kıik sanyn atý arqyly retteýden bas tartpaqshy ekeni týraly jazǵan edik.