Kıikterdi atý arqyly retteý máseleni sheshe me – sarapshy pikiri

ASTANA. KAZINFORM – Qazaqstannyń Ekologııalyq uıymdar qaýymdastyǵynyń tóraıymy Aıgúl Soloveva kıikterdiń sany jáne olardyń egistik alqaptaryna áseri jóninde pikirin aıtty. 

Ekologtyń aıtýynsha, janýarlardy atý – máseleniń sheshimi bola almaıdy. Kerisinshe, bul áreket bıoalýantúrlilikti saqtaý qaǵıdattaryna qaıshy keledi.

– Meniń túsinýimshe, kıikterdiń bıologııalyq mıgratsııalyq baǵyttary bar, olar únemi sol baǵyttarmen kóship-qonady. Al eger ákimdikter osy joldardyń boıyndaǵy jerlerdi taratyp berse, kıikter ony taptap ótedi. Bul kıikterdiń tabıǵı bolmysyn túsinbegen adamdardyń shaǵymy, - dedi Aıgúl Soloveva agenttik tilshisine bergen suhbatynda.

Sarapshy kıikter popýlıatsııasyn azaıtý ekologııalyq turǵydan anaǵurlym kúrdeli saldarǵa ákelýi múmkin ekenin aıtyp otyr. 

– Eger biz kıikterdiń sanyn azaıtsaq, onda topyraq quramy ózgerýi múmkin, sý tapshylyǵy sekildi máseleler týyndaıdy. Bul birtutas tsıkl, - dedi A. Soloveva.

Ekologııalyq uıymdar qaýymdastyǵynyń tóraıymy bul máseleni ǵylymı turǵyda sheshý kerek ekenin aıtty. Sonymen birge ǵylymı zertteý jumystaryna táýelsiz mamandar shaqyrylýy qajet.

– Meniń oıymsha, bul jerde ǵylymı qaýymdastyqtyń qatysýy mindetti. Biraq olar tek buıryqpen jumys isteıtin emes, shyn máninde sapaly taldaý jasap, ne isteý kerektigin aıqyndaı alatyn mamandar bolýy kerek. Janýarlardyń tabıǵı mıgratsııalyq joldary men minez-qulqyn eskeretin jaǵdaı jasalsa, kıikter egistik alqaptaryna zııan keltirmes edi, - deıdi A. Soloveva.

Aıta keteıik, kıik sanyn retteýge, aýlaýǵa qatysty ǵalymdardyń bıologııalyq negizdemesi áli daıyn emes. Dál osy qujatqa, sáıkes, kıiktiń belgili bir sanyn aýlaý máselesi kóteriledi.

Sondaı-aq ańshylarǵa tek analyq kıikti atýǵa ruqsat bekitilýi múmkin. 

Al Batys Qazaqstanda sýǵa batqan 560-tan astam kıiktiń óleksesi joıyldy.