Kıikti qaıta jersindirý: Qazaqstan men Ózbekstan memorandýǵa qol qoıdy
ASTANA. KAZINFORM – Qazaqstan men Ózbekstan kıik popýlıatsııasyn saqtaý jáne qalpyna keltirý baǵytyndaǵy yntymaqtastyqty kúsheıtedi. Osy maqsatta eki el ózara túsinistik týraly memorandýmǵa qol qoıdy.
Qujatqa Qazaqstannyń Ekologııa jáne tabıǵı resýrstar mınıstri Álibek Qýantyrov pen Ózbekstan Ekologııa jáne klımattyń ózgerýi jónindegi ulttyq komıtetiniń tóraǵasy Azız Abdýhakımov qol qoıdy.
Memorandým aıasynda taraptar kıikterdiń transshekaralyq kóshi-qon joldaryn saqtap, tabıǵı mekendeý ortasyn qalpyna keltirý boıynsha birlesip jumys isteıdi.
Sondaı-aq eki el kıikterdiń sanyna, kóshi-qonyna jáne densaýlyq jaǵdaıyna birlesken monıtorıng júrgizýdi, ǵylymı derektermen almasýdy kózdep otyr. Bul baǵytta spýtnıktik baqylaý men veterınarııalyq qadaǵalaý ádisteri qoldanylady.
Yntymaqtastyqtyń negizgi basymdyqtarynyń biri – kıiktiń tarıhı mekendeý aýmaqtaryndaǵy popýlıatsııasyn qalpyna keltirý. Osy maqsatta qaıta jersindirý baǵdarlamasyn ázirleý, janýarlardy kóshirý, tabıǵı jaıylymdar men sý kózderin qalpyna keltirý josparlanǵan.
Budan bólek, taraptar brakonerlik pen janýarlardyń zańsyz saýdasyna qarsy kúresti kúsheıtedi. Birlesken tabıǵat qorǵaý reıdterin ótkizý, transshekaralyq qorǵalatyn aýmaqtar men kóshi-qon dálizderin damytý da kelisilgen yntymaqtastyq baǵyttaryna kiredi.
Memorandým ǵylymı-zertteý uıymdary, halyqaralyq seriktester men tabıǵat qorǵaý mamandary arasynda tájirıbe almasýǵa múmkindik beredi.
Birlesken bastama kıik popýlıatsııasyn uzaq merzimge saqtaýǵa, bıoalýantúrlilikti qorǵaýǵa jáne Ortalyq Azııadaǵy ekologııalyq yntymaqtastyqty damytýǵa baǵyttalǵan.
Osyǵan deıin Qazaqstan men Ózbekstan kıikterdi qaıta jersindirý máselesin talqylaǵan bolatyn.