Kiki Challenge fleshmobyna qatysýshylar jaýapkershilikke tartylýy múmkin
KÓKShETAÝ. QazAqparat- Aqmola oblysynyń polıtseıleri tanymal Kiki Challenge fleshmobynda jol qozǵalysy erejesiniń buzylatynyn eskertedi, dep habarlaıdy QazAqparat tilshisi ІІD baspasóz qyzmetine silteme jasap.
Vedomstvonyń məlimetinshe, sońǵy kezderi elimizde Kiki Challenge fleshmoby beleń aldy. Oǵan qatysýshylar júrip kele jatqan avtokólik salonynan sekirip túsip, ər túrli trekke bıleı jóneledi.
Aqmola oblysynyń ІІD JPQ qyzmetkerleri júrgizgen ýaqtyly túsindirý jumystarynyń nətıjesinde óńirde mundaı qaýipti fleshmob ótkizilgen joq. Degenmen, turǵyndardyń qaýipsizdigin qamtamasyz etýde polıtseıler mundaı fleshmobty jol qozǵalysy erejesin buzý dep sanaıdy.
«Bulaı kóńil kóterý jol qozǵalysy erejesin buzý retinde qarastyrylady. Jol qozǵalysy erejesiniń 2.1.4 pýnktine sáıkes, júrgizýshi kóliginiń ózdiginen qozǵalyp ketpeıtinine tolyq kóz jetkizip almaı, kóliginen túsip, ketip qalýyna bolmaıdy. Oǵan qosa, jol qozǵalysy erejesiniń 19.5 pýnktine sáıkes, júrgizýshi kólik quraly tolyqtaı toqtaǵannan keıin ǵana jolaýshylardy otyrǵyzýǵa jáne túsirýge, qozǵalysty kóliktiń esigi tolyq jabylǵan kezde ǵana júzege asyrýǵa mindetti. Júrip kele jatqan kólikten sekirip shyǵý arqyly tərtip buzýshylar jol qozǵalysynyń ózge qatysýshylaryna qaýip tóndiredi» dep túsindirdi Aqmola oblysynyń ІІD JPQ bólim basshysy, polıtsııa podpolkovnıgi Qýanyshbek Əbenov.
