Kiki Challenge fleshmoby: Júrgizýshi 6 aıǵa kýáliginen aıyrylady
ATYRAÝ. QazAqparat - Atyraýda «Kiki Challenge» fleshmoby beleń alǵan. Oǵan qatysýshylar júrip kele jatqan avtokólik salonynan sekirip túsip, ánniń yrǵaǵyna bıleı bastaıdy, dep habarlaıdy QazAqparat tilshisi.
«Mundaı jaǵdaılar kúnnen kúnge artyp keledi. Ony áleýmettik jelilerden baıqaýǵa bolady. Fleshmob qatysýshylary joldyń ortasynda toqtap, jol erejesin buzyp qana qoımaı, óziniń de, ózgeniń de basyn qaýipke tigedi.Osyǵan baılanysty, Atyraý oblysynyń ІІD mundaı tártip buzýshylyqtar boıynsha QR Ákimshilik quqyqbuzýshylyq týraly kodeksiniń birneshe babyna sáıkes, ákimshilik jaýapkershilikke tartý isi qarastyrylǵanyn eskertedi», -delingen baspasóz habarlamasynda.
Polıtseıler fleshmobqa baılanysty tártip buzǵan azamattar aıyppul tóleıtinin nemese úsh táýlikke qamaýǵa alynatynyn eskertedi. Sondaı-aq, olar 6 aıǵa deıin júrgizýshi kýáliginen aıyrylatyn bolady.
Eske sala keteıik, QR ІІM Ákimshilik polıtsııa komıtetinde Kiki Challenge fleshmobyna qatysty pikir bildirgen edi.
