Kıkboksıngten Qazaqstan kýbogy jarysy ótedi
ALMATY. Naýryzdyń 20-sy. QazAqparat /Erlik Erjanuly/ - Astanada naýryzdyń 25-28-i kúnderi kıkboksıngten erler arasynda Qazaqstan Respýblıkasynyń kýbogy úshin jarys ótedi,
dep habarlaıdy QazAqparat.
Ony Astana qalasy ákimdiginiń týrızm, dene tárbıesi jáne sport basqarmasy uıymdastyryp otyr. Bul baıraqty báseke Qazaqstan kıkboksınginiń 20 jyldyq merekesine arnalmaq. Oǵan elimizdiń 14 oblysy men respýblıkalyq mártebesi bar Astana, Almaty qalalarynyń úzdik sportshylary qatysady. Jarystyń ashylý rásimine «WAKO-Kazakhstan» QR Kıkboksıng federatsııasynyń prezıdenti, QR Parlament Májilisiniń depýtaty Irak Elekeev, ulttyq quramanyń bas bapkeri Qaırat Smaǵulov qatysatyn bolady.
Jalpy Qazaqstandaǵy jekpe-jek kúres túrleriniń eń jasy bolsa da qazaqstandyq kıkboksıngshiler 20 jyldyń ishinde birshama jetistikterge qol jetkizdi. Máselen, byltyr Taı elinde ótken jekpe-jek kúresi sport túrleri boıynsha І Azııa oıyndarynda 40 memlekettiń arasynda jalpykomandalyq esepte Qazaqstan quramasy birinshi oryndy ıelendi. Olar bul dúbirli dodada 3 altyn, 2 kúmis jáne 2 qola júldege ıe boldy. Vetnamda qarasha aıynda ótken jabyq keshendegi ІІІ Azııa oıyndarynda 2 altyn, 3 qola medal enshilep, Qazaqstannyń 3-shi oryn alýyna eleýli úles qosty. Al Italııada ótken Álem chempıonatynda qazaqstandyq kıkboksıngshiler 1 kúmis jáne 3 qola júlde aldy.
