Kıkboksıng: 18 jastaǵy boıjetken Qazaqstan chempıony boldy
PETROPAVL. QazAqparat - Kıkboksıngten eresekter arasyndaǵy Qazaqstan chempıonatynda Soltústik Qazaqstan oblysynyń sportshylary eki altyn, eki kúmis jáne bir qola medal ıemdendi, dep habarlaıdy QazAqparat tilshisi.
Soltústik Qazaqstan oblysy deneshynyqtyrý jáne sport basqarmasynyń baspasóz qyzmeti bergen málimetke qaraǵanda, fýl-kontakt boıynsha 54 kg salmaq sanatynda Evgenıı Pavlov birinshi oryndy jeńip aldy. Qyzdar arasynda 70 kılogramǵa deıingi salmaqta óner kórsetken 18 jastaǵy Jansulý Qajaýova da altyn medal aldy. Ol Qazaqstannyń jastar quramasynyń quramyna kiredi.
«Biz ony jarysqa osy aıda Óskemende ótetin jastar arasyndaǵy Qazaqstan chempıonatyna daıyndaý úshin ákelgen edik. Al ol eresekter arasynda qıyn úsh jekpe-jek ótkizip el chempıony boldy», - deıdi kıkboksıngten oblystyń aǵa bapkeri Ádil Nurjaýypov.
Kúmis júldeni 91 kg sanatynda Nursultan Jáýletbaev, 70 kılogramǵa deıingi salmaqta Darına Bıldenova qorjynǵa saldy. Al 51 kg sanatynda óner kórsetken Nurlan Aldabergenov qola júldemen shekteldi.
Týrnırge elimizdiń barlyń óńirinen 195 sportshy qatysty. Chempıonat bıyl Italııada ótetin Álem kýbogyna irikteý kezeńi mindetin atqardy.
Foto: pg11.ru
