Kıik sanyn retteýdiń qosymsha tásilderine túrli zertteý júrgizilip jatyr
ASTANA. KAZINFORM – Kıik sanyn retteýdiń qosymsha tásilderin zerdeleý maqsatynda túrli zertteýler júrgizilip jatyr. Bul týraly Májilis depýtattarynyń saýalyna Premer-Mınıstr Oljas Bektenovtiń jaýabynda aıtylǵan.
«Búgingi tańda kıik Qazaqstandaǵy tuıaqty janýarlardyń eń kóp taralǵan túri. Salystyratyn bolsaq, Qazaqstandaǵy basqa tuıaqty janýarlardyń báriniń jalpy sany 200 myńnan aspaıdy»,- dedi Úkimet basshysy jaýabynda.
Premer-Mınıstr jaýabyna qosymsha berilgen anyqtamaǵa sáıkes, sany 2,6 mln bolatyn kıikten keıingi ekinshi oryndaǵy tuıaqty janýar – buǵynyń sany 95,5 myń quraıdy.
«Osyǵan oraı, kıik sanyn retteý olardyń aýyl sharýashylyǵyna teris áserin azaıtýǵa, bıologııalyq tepe-teńdikti saqtaýǵa jáne azyqtyn jetispeýi men epızootııa saldarynan jappaı qyrylý qaýpiniń aldyn alýǵa baǵyttalǵan. Sonymen qatar, osy jyldyń 10 aqpannan bastap kıik sanyn retteý jónindegi is-sharalar toqtatyldy. Kıik sanyn retteýdiń qosymsha tásilderin zerdeleý maqsatynda qazirgi ýaqytta ǵylymı qoǵamdastyq olardy ornyqty paıdalanýǵa, epızotııalardyń paıda bolý sebepterin anyqtaýǵa jáne kıikterdiń resýrstaryn qorǵaý jáne paıdalanýdyń yqtımal joldary boıynsha sharalar ázirleýge baǵyttalǵan túrli zertteýler júrgizýde», - dedi Oljas Bektenov.
