Kıik sanyn retteý is-sharalary kúzde bastalýy múmkin

ASTANA. KAZINFORM — Eger kıikti aýlaýǵa ruqsat berilse, bul is-sharalar kúzde bastalady. Bul týraly Ekologııa jáne tabıǵı resýrstar vıtse-mınıstri Nurken Shárbıev málim etti.

— Qazir kıik tóldep jatyr. Jalpy, kıik sanyn retteý is-sharalary qyrkúıek aıynda bastalyp, qarashanyń aıaǵyna deıin iske asyrylýy múmkin… Atap aıtqanda, kıik sanyn retteý máselesi ǵalymdardyń bıologııalyq negizdemesi aıasynda sheshiledi, — dedi N. Shárbıev Parlament Májilisinde tilshiler suraǵyna jaýap bere otyryp.

Onyń aıtýynsha, búgin Parlament Májilisindegi talqylaý kezinde ǵalymdar tıisti málimetterdi keltirgen. Keńestik kezeńde jyl saıyn kıik sany retteýge ruqsat beretin, ıaǵnı 300 myńyn azaıtýǵa sheshim jasalyp otyrǵan. Bul rette, jylda 20 paıyzyn aýlaǵan.

Aıta keteıik, osy aptada Úkimetke kıik sanyn retteýge qatysty ǵalymdardy bıologııalyq negizdemesi usynylady.

Budan buryn habarlanǵandaı, búgin Májilistegi Agrarlyq máseleler komıtetiniń keńeıtilgen otyrysynda kıiktiń egis alqaptary men shabyndyqtardy taptap ketýinen Batys Qazaqstan jáne Aqmola oblysynyń fermerleri men aýyl turǵyndary zardap shegip jatqany aıtyldy.

Sonymen qatar, Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń ǵylym jónindegi prorektory, bıologııa ǵylymdarynyń doktory Áljan Shámshidin kıikke qatysty jasalǵan zertteýler jóninde túsinik berdi. 

Onyń paıymynsha, elimizdegi 4-5 mln kıiktiń jyl saıyn 20 paıyzyn etke paıdalanýǵa berýge bolady.