Kıik sanyn rettemese ne bolady – Ekologııa mınıstrliginiń jaýaby
ASTANA. KAZINFORM – Ekologııa jáne tabıǵı resýrstar mınıstrliginiń Orman sharýashylyǵy jáne janýarlar dúnıesi komıteti tóraǵasynyń mindetin atqarýshy Danııar Turǵambaev kıik sanyn memleket rettemese, ne bolatyny týraly paıymyn aıtty.
«Ǵalymdar Qazaqstan aýmaǵyndaǵy kıikterdi óte kóp zerttegen. Sovet zamanynda eń úlken popýlıatsııa 1,2 mln basqa deıin ǵana jetken. Ǵalymdardyń esebi boıynsha, Qazaqstan aýmaǵyndaǵy kıiktiń eń ońtaıly popýlıatsııasy 800-900 myńǵa deıin bolý kerek. Odan assa, eń birinshiden, bir-birimen báseke artyp, epızotıkalyq aýrýdan óte úlken qaýip bar. Bir-birine juqtyryp popýlıatsııanyń bárin joǵaltyp alamyz degen qaýip bar», - dedi mınıstrlik ókili.
Sondaı-aq, ol kıiktiń kóbeıýi sharýalarǵa zııan tıgizedi degen ýáj aıtty.
«Ekinshiden, kıikter aýyl sharýashylyǵymen de básekede tur. Aýyl sharýashylyǵyn da umytpaýymyz kerek. Qazir jer jetispeıdi. Sondyqtan optımaldy túrde 800-900 myńǵa deıin ǵana degen ǵalymdardyń esebi bar», - dedi Danııar Turǵambaev.
