Kıik sanyn atpaı-aq retteýge bolady – Májilis depýtaty

ASTANA. KAZINFORM – Májilis depýtaty Erbolat Saýryqov kıik sanyn retteýge arnalǵan dóńgelek ústel aldynda jýrnalısterge osy máselege baılanysty ustanymyn aıtty.

«Aýyl» partııasynyń ókili qazir shynymen de kıik jaılaıtyn óńirlerdegi sharýalardan túrli shaǵymdar túsip jatqanyn aıtady. Sondyqtan kıik sanyn retteýdiń ońtaıly jolyn qaıtkende de tabý kerek. Biraq ol tásil kıik atýdan basqasha jol bolý kerek dep esepteıdi.

- Jeke ózim kıik sanyn atý arqyly retteýge qarsymyn. Byltyr 235 myń basty atýǵa ruqsat berilgen kezde mınıstrmen sóılestim. Qańtar aıynda olar áli 85 myń bas atamyz, 10 aqpanǵa deıin ruqsat bar degendi aıtty. Sonyń negizinde Premer-mınıstr Oljas Bektenovtiń atyna hat joldap, toqtatqan adamnyń biri men edim.

Óıtkeni býaz kezinde, ishinde 2-3 laǵy bar bastardy atý obal bolady, - deıdi ol.

Erbolat Saýryqovtyń sózinshe, kıik sanyn retteýdiń úshinshi joly bar. 

- Ol úshin arnaıy tsehter uıymdastyrý nemese buqtyrylǵan et óndirisin jolǵa qoıý qajet. Biraq etke alynatyn kıikterdi tormen aýlaý nemese qamap ustaý tásilderin qoldaný kerek. Mysaly shetelde úlken-úlken arystandardy, jolbarystardy atpaı-aq ustap jatqanda kıikti ustaýdyń ádisin tabýǵa bolady dep oılaımyn, - deıdi depýtat.

Eske salsaq, buǵan deıin Ekologııa jáne tabıǵı resýrstar mınıstri Erlan Nsyanbaev memleket kıik atý tásilinen bas tartpaǵanyn málim etken edi.