Kıik ólekselerin joıýǵa ormanshylar men ańshylar jumyldyryldy ma – Ekologııa mınıstrligi jaýap berdi
ASTANA. KAZINFORM – Áleýmettik jelide tabıǵat qorǵaýshy Batyr Seıkenovtiń vıdeosy tarady. Onda avtor kıik ólekselerin joıý jumystaryna ormanshylar men ańshylardyń jumyldyrylǵany aıtylady.
- Ekologııa mınıstrligi basshylyǵynyń aýyzsha buıryǵy túsipti. Dál osy mınıstrlik barlyq ormanshylardy, ańshylar men memlekettik qyzmetshilerdi Ulytaý oblysynda kıik ólekselerin jınaýǵa jiberedi. Alaıda, ólekseler búkil Qazaqstanda jatyr. Buıryq mynadaı, aıyrym belgisiz, kıim úlgisinsiz shyǵý qajet. Ólekselerdi jınaý úshin adam qoly jetpeı jatyr. Óıtkeni, ólgen kıik óte kóp, - dedi ol TikTok-ta jarııalaǵan vıdeosynda.
Osy máselege oraı Kazinform agenttigi Ekologııa jáne tabıǵı resýrstar mınıstrligine saýal joldaǵan edi.
Vedomstvo málimetinshe, Ulytaý oblysynda jáne basqa da óńirlerde kıik ólekselerin jınaý jáne joıý jumystaryn vedomstvoaralyq is-qımyldyń bekitilgen birlesken algorıtmi aıasynda Orman sharýashylyǵy jáne janýarlar dúnıesi komıtetiniń aýmaqtyq jáne vedomstvolyq bólimsheleri veterınarlyq qyzmettermen, ákimdiktermen, polıtsııa jáne TJM qyzmetkerlerimen birge júrgizip jatyr.
- «Tik Tok» áleýmettik jelisin paıdalanýshy Batyr Seıkenovtiń «Ulytaý oblysynda kıikterdiń óleksesin jınaýǵa jáne joıýǵa Ekologııa mınıstrliginiń memlekettik qyzmetkerleri, ormanshylar men ańshylar aıyrym belgisiz, kıim úlgisinsiz jumyldyrylyp jatyr» delingen aqparaty shyndyqqa janaspaıdy. Ulytaý oblysynyń aýmaǵynda kıik ólekseleri kóp tabylýyna baılanysy Orman sharýashylyǵy jáne janýarlar dúnıesi komıtetiniń vedomstvolyq bólimshelerinen qosymsha kúsh jumyldyryldy. Jumyldyrylǵan barlyq maman ózderiniń quziretteri aıasynda belgilengen tártippen jáne qaýipsizdik talaptaryn saqtaı otyryp jumys isteýde», - dep naqtylady mınıstrlikten.
Buǵan deıin Ulytaý oblysynda 14 myńǵa jýyq kıiktiń óleksesi joıylǵanyn jazǵan edik.