Kıik múıizin zańdy túrde eksporttaýǵa ruqsat berilýi múmkin

ASTANA. KAZINFORM – Bıyl kúzde kıikterdi aýlaý bastalǵan jaǵdaıda, ańshylar janýarlardyń múıizin qaıda ótkizedi? Bul suraqqa QR Ekologııa jáne tabıǵı resýrstar mınıstrligi jaýap berdi.

- 2023-2024 jylǵy (kıik sanyn) retteý sharalary nátıjesinde alynǵan kıik múıizderi qazirgi ýaqytta «Ohotzooprom» ÓB» RMQK-nyń baqylaýynda saqtaýly tur. Bul múıizder arnaıy jabdyqtalǵan jalǵa alynǵan bólmede ornalastyrylǵan. Bólmede beınebaqylaý júıesi, turaqty temperatýralyq rejım jáne barlyq qajetti qaýipsizdik sharalary qamtamasyz etilgen. Alaıda, qazirgi ýaqytta halyqaralyq shekteýlerge baılanysty kıik múıizderin kádege jaratý múmkin emes, - delingen mınıstrliktiń Kazinform agenttigine bergen jaýabynda.

Bul shekteýler quryp ketý qaýpi tóngen jabaıy faýna men flora túrlerimen halyqaralyq saýda týraly konventsııa (CITES) aıasyndaǵy shekteýlermen baılanysty. Sonymen qatar vedomstvo bıyl kúzde kıik aýlaý bastalǵan jaǵdaıda, bókenderdiń múıizi qaıda saqtalatynyn naqtylady.

- Bıyl júrgiziletin retteý nátıjesinde alynǵa kıik múıizderi de «Ohotzooprom» ÓB» RMQK-da saqtaýda bolady. CITES qoıǵan shekteýlerdi alý osy jyldyń qarasha aıynda taraptardyń kezdesýinde qarastyrylatyn bolady. Shekteýler alynǵan jaǵdaıda, múıizderdiń eksportyna ruqsat beriledi, - dep atalyp ótken Ekologııa mınıstrligi aqparatynda.

Eske salsaq, jaqynda Ekologııa jáne tabıǵı resýrstar mınıstri Erlan Nysanbaev ǵalymdardyń bıologııalyq negizdemesi aıasynda Qazaqstanda kıikterdiń 20 paıyzy retteýge jatatynyn aıtty. 

Eger kıikti aýlaýǵa ruqsat berilse, bul is-sharalar kúzde bastalady. 

Sonymen qatar, Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń ǵylym jónindegi prorektory, bıologııa ǵylymdarynyń doktory Áljan Shámshidin kıikke qatysty jasalǵan zertteýler jóninde túsinik berdi. 

Budan buryn habarlanǵandaı, 2023 jyly el aýmaǵynda 42 myń bas kıik atyldy. 

«Ohotzooprom» ózderi atqan kıikterden qansha múıiz alynǵanyn aıtty.