Kıik múıizin eksporttaý: saýda lımıti qansha
ASTANA. KAZINFORM - Ekologııa jáne tabıǵı resýrstar mınıstrligi elimizde jalpy qansha kıik múıizi tańbalanǵanyn málimdedi.
- 2025 jylǵy jeltoqsanda Qazaqstan Respýblıkasy CITES konventsııasynan kıik múıizderin eksportqa úsh jyl boıy, jalpy lımıti 30 tonna kóleminde saýdalaýǵa ruqsat aldy. Bul shekteý eksportqa qatysty, alaıda el ishindegi aınalym men qaıta óńdeýge shekteý qoımaıdy. Atalǵan ruqsat 2026 jylǵy 5 naýryzda kúshine endi.
Qazaqstanǵa kıiktiń bútin múıizderin tek memlekettik qorlardan ǵana halyqaralyq saýdalaýǵa ruqsat etilgen. Bul rette olardy mindetti túrde tańbalaý jáne tsıfrlyq qadaǵalanýyn qamtamasyz etý, sondaı-aq CITES Hatshylyǵyna satyp alýshylardyń qoımalaryndaǵy ónim qaldyqtary týraly aqparat berý mindettemesi júkteledi, - delingen mınıstrliktiń Kazinform agenttigine bergen jaýabynda.
Aıta keteıik, kıikterdiń barlyq múıizi eskerilip, tańbalanyp, mınıstrlikke vedomstvolyq baǵynysty «Ohotzooprom» ÓB» RMQK uıymynda kúsheıtilgen kúzet jáne mamandandyrylǵan ınfraqurylym jaǵdaılarynda saqtalatyny málim.
- Kıik popýlıatsııasyn basqarý kezeńinde barlyǵy 232 157 kıik múıizi tańbalanyp, olar «Ohotzooprom» ÓB» RMQK-da saqtaýǵa qoıylǵan, - dep naqtylady vedomstvo.
Budan buryn habarlanǵandaı, kıik sanaǵynyń nátıjesi jazda shyǵady.
Eske salsaq, byltyr jeltoqsan aıynda Qazaqstan kıik múıizin eksporttaıtyny málim boldy.
Al bıyl naýryz aıynda Ekologııa jáne tabıǵı resýrstar mınıstri Erlan Nysanbaev odan túsken qarajat qaı maqsatta jumsalatynyn aıtty. Aqsha bıoalýantúrlilikti saqtaýǵa, kıikterdi qorǵaýǵa, sharýashylyqtardy materıaldyq-tehnıkalyq qamtamasyz etýge jumsalady.
Bul rette Saýda mınıstrligimen birge eksport júıesi pysyqtalyp jatyr.
