Kıik múıizi 4 tamyzdan bastap jańa erejeler boıynsha satylady

Qujatqa sáıkes, «kıik derıvattary» degenimiz – janýardyń múıizderi, sondaı-aq, olardan óndirilgen ónimder.

Derıvattardy ótkizý elektrondyq konkýrs túrinde júzege asyrylady. Satý týraly sheshimdi ýákiletti organ qabyldap, satý baǵasyn, ótkizý kólemin jáne komıssııa quramyn aıqyndaıdy. Tıisti sheshim qabyldanǵannan keıin satýshy 10 kúntizbelik kún ishinde memlekettik múlik tiziliminiń veb-portalynda konkýrs týraly aqparatty jarııalaýǵa mindetti.

Kıik derıvattaryn satý ýákiletti organnyń sheshimine baılanysty toqsanyna keminde bir ret ótkiziledi. Sonymen birge, joıylyp ketý qaýpi tóngen jabaıy faýna men flora túrleriniń halyqaralyq saýdasy týraly CITES konventsııasynyń talaptary saqtalýy tıis.

Konkýrsty uıymdastyrý jáne ótkizý úshin bes adamnan turatyn komıssııa qurylady. Saýda-sattyqqa daıyndyq barysynda satylatyn derıvattar týraly materıaldar jınaqtalady, konkýrs ótkizý merzimderi belgilenedi, habarlandyrý jarııalanady, kepildik jarnalar qabyldanady, qatysýshylar tirkeledi jáne satyp alý-satý shartynyń jobasy daıyndalady.

Habarlandyrý jarııalanǵanǵa deıin satýshy veb-portaldyń derekqoryna árbir lot boıynsha mynadaı málimetterdi engizýge mindetti:

• satylatyn derıvattar týraly aqparat;

• olardyń ornalasqan jeri;

• teńgerim ustaýshynyń poshtalyq mekenjaıy, telefon nómiri jáne elektrondyq poshta mekenjaıy;

• árbir lottyń keminde bes fotosýreti.

Konkýrs týraly habarlandyrý qazaq, orys jáne aǵylshyn tilderinde jarııalanady. Onda konkýrs ótkiziletin kún men ýaqyty, konkýrs ataýy, bastapqy baǵa, kepildik jarna mólsheri, uıymdastyrýshynyń banktik derektemeleri, qatysý sharttary, qatysýshylarǵa qoıylatyn talaptar, ótinim qabyldaý merzimderi, satýshy men uıymdastyrýshynyń baılanys derekteri kórsetilýi kerek.

Konkýrsqa qatysý úshin memlekettik múlik tiziliminiń veb-portalynda tirkelý qajet. Sonymen qatar, mynadaı málimetter usynylady: zańdy tulǵanyń BSN-i, tolyq ataýy, birinshi basshy týraly málimetter, kepildik jarnany qaıtarýǵa arnalǵan bank shotynyń derektemeleri, baılanys aqparaty.

Ótinim elektrondyq tsıfrlyq qoltańbamen (ETsQ) kýálandyrylady. Onda konkýrs talaptarymen kelisetini, baǵa usynysy jáne belgilengen talaptarǵa sáıkestigin rastaıtyn qujattar qamtylýy tıis.

Konkýrsqa qatysýshylar birqatar qujat usynady. Olar – zańdy tulǵany memlekettik tirkeý týraly qujattar; kıik derıvattaryn paıdalana otyryp dárilik zattardy nemese farmatsevtıkalyq ónimderdi óndirýge arnalǵan lıtsenzııalar nemese ruqsattar; qoldanystaǵy GMP jáne GDP sertıfıkattary; derıvattardy ımporttaý, kedendik rásimdeý, saqtaý, óńdeý jáne paıdalaný quqyǵyn rastaıtyn qujattar.

Sonymen qatar, qatysýshylar jazbasha túrde mynadaı mindettemelerdi qabyldaıdy:

• kıik múıizderin Qazaqstan aýmaǵynda satpaý;

• eksportqa baılanysty barlyq qajetti qujattardy óz betinshe rásimdep, shyǵyndardy óteý;

• ýákiletti organǵa derıvattardyń úshinshi tulǵalarǵa odan ári ótkizilýi týraly málimetter berý;

• derıvattar men olardan óndirilgen ónimderdiń qozǵalysy týraly aqparatty óz eliniń tsıfrlyq qadaǵalaý júıesine engizý.

Budan bólek, sheteldik zańdy tulǵalar quryltaı qujattarynyń notarıaldy kýálandyrǵan kóshirmelerin jáne qajetti qujattardy qazaq jáne (nemese) orys tilderine aýdarmasymen birge usynýy tıis.

Ótinim berilgenge deıin qatysýshy konkýrs týraly habarlandyrýda kórsetilgen derıvattar qunynyń 15%-y mólsherinde kepildik jarna tóleýge mindetti.

Avtomatty tekserýden keıin veb-portal qatysýshyǵa ótinimniń qabyldanǵany nemese bas tartylǵany týraly habarlama jiberedi. Onda sebepteri kórsetiledi. Budan keıin komıssııa ótinimderdi qarap, konkýrsqa jiberiletin qatysýshylardy anyqtaıdy.

Ótinimder habarlandyrýda kórsetilgen kún men ýaqytta avtomatty túrde ashylady. Konkýrsqa jiberilgen qatysýshylar saýda zalyna konkýrs bastalǵanǵa deıin keminde bir saǵat buryn qol jetkize alady.

Kıik derıvattary úshin eń joǵary baǵany usynǵan qatysýshy jeńimpaz bolyp tanylady. Satylǵan ár lottyń qorytyndysy boıynsha hattama toltyrylyp, oǵan satýshy men jeńimpaz ETsQ arqyly qol qoıady.

Satyp alý-satý sharty konkýrs qorytyndylary shyǵarylǵannan keıin 10 kúntizbelik kún ishinde memlekettik múlik tiziliminiń veb-portaly arqyly elektrondyq formatta nemese jazbasha túrde jasalady.

Atalǵan buıryq 2026 jylǵy 4 tamyzdan bastap kúshine enedi.

Aıta keteıik, buǵan deıin Qazaqstanda kıik etin qaıdan jáne qanshadan alýǵa bolatynyn jazǵanbyz.