QIK ıpotekany arzandatý týraly Atamekenniń usynysyna jaýap berdi
«Danıal Kenjetaıuly (ShQO ákimi - avt.) aıtady, baspana qurylysyn qarjylandyrýdyń qajeti qansha? Onyń bárin ekinshi deńgeıli bankterge berip tastaýǵa bolady ǵoı. Al áleýmettik jaǵynan az qamtylǵandarǵa kómektesetin bolsaq, arzan ıpotekany bereıik. Qazir bizde turǵyn úı qurylysymen «Samuryq-Qazyna» aınalysady, «Báıterek» holdıngi aınalysady. Olar baspana qurylysymen emes, el ekonomıkasymen aınalysýy qajet. Al turǵyn úı qurylysyn jeke bıznes te atqara alady. Buny jaı adam aıtyp otyrǵan joq. Ákim aıtyp otyr. Ol da kezinde Úkimetti basqarǵan», - dedi «Atameken» UKP prezıdıým tóraǵasy Tımýr Qulybaev.
Onyń aıtýynsha, memlekettiń qyrýar qarajatyn «Samuryq-Qazyna» qory, «Báıterek» xoldıngi men ákimdikter arqyly qurylysqa salǵansha, ol aqshaǵa ıpotekanyń paıyzdyq mólsherlemesin sýbsıdııalaýǵa bolady. Osylaısha, turǵyn úı ıpotekasyn xalyqqa barynsha qoljetimdi etýge múmkindik bar.
QazAqparat tilshisine suxbat bergen Qazaqstannyń ıpotekalyq kompanııasynyń basshysy Ádil Muxamedjanov atalǵan usynysqa qatysty óz pikirin bildirdi.
«Endi, biz dál osy jumyspen aınalysyp jatyrmyz ǵoı. Búginde Qazaqstannyń ıpotekalyq kompanııasy kez kelgen ıpotekany sýbsıdııalaıdy. Árbir adam ózi tańdaǵan páterdi alyp, ıpotekany rásimdeı alady. Biz bolsaq, sol nesıeniń paıyzdyq mólsherlemesin sýbsıdııalaımyz. Bıyl 1 myń adam, kelesi jyly 7 myń, barlyǵy 8 myń adam arzan ıpoteka alsa, bul - ájeptáýir jeńildik. Osy baǵdarlama (ıpotekalyq zaımdardy sýbsıdııalaý - avt.) óz tıimdiligin kórsetse, ary qaraı jalǵasyn tabady. Negizi, «Atamekenniń» usynǵany - qazirdiń ózinde istep turǵan mexanızm», - dedi Á.Muxamedjanov.
Onyń aıtýynsha, bıyl «Nurly jer» baǵdarlamasy aıasynda ıpotekany sýbsıdııalaý baǵdarlamasy bastalǵaly beri 1 209 ótinim kelip túsken. Búginde 12 mlrd teńgeniń 1 180 ótinimi maquldandy. Kelesi jyly ekinshi deńgeıli bankter arqyly taǵy 7 myńǵa jýyq arzan ıpotekany berý josparlanǵan. Jalpy, barlyq zaımdardy sýbsıdııalaýǵa 120 mlrd teńge jumsalady. «Ol aqshanyń ózi birazyna jetedi. Meni ony anyq bilemin», - dep atap kórsetti kompanııa basshysy.
Aıta ketken jón, Qazaqstannyń ıpotekalyq kompanııasynyń sýbsıdııalary tek jańadan alynǵan nesıelerge ǵana beriledi. Burynǵy zaımdardy qaıta qarjylandyrý qarastyrylmaǵan. Osy baǵdarlamanyń arqasynda alǵashqy nesıeniń mólsherlemesin 10 paıyzǵa deıin tómedetýge múmkindik bar.
