Kıik eti taýyq etinen arzan bola ma — mınıstr jaýaby

ASTANA. KAZINFORM — Aýyl sharýashylyǵy mınıstri Aıdarbek Saparov Úkimet otyrysynan keıin ótken baspasóz máslıhatynda kıik etiniń bir kılogramy neshe teńgeden satylýy múmkin ekenin aıtty.

— Kıik etin satý qolǵa alynǵany belgili. Bıyl onyń baǵasy sıyrdyń nemese taýyqtyń etinen arzan bola ma, — dep surady jýrnalıst.

Aıdarbek Saparov jumys endi bastalyp jatqandyqtan qazir naqty baǵany boljaý qıyn ekenin túsindirdi.

— Jumys endi ǵana bastaldy. Bul máselemen ekologııa mınıstrligi aınalysyp jatyr. Bizdiń mindet — et kombınattaryn qamtamasyz etý. Qazir elde 18 et kombınaty tirkelgen. Veterınarlar da sonda júr. Kıik eti qanshaǵa satylatyny, tabysy qansha bolatyny logıstıkaǵa, basqa da faktorlarǵa baılanysty. Bir apta nemese 10 kúnniń ishinde qosymsha naqty baǵany aıtamyz dep oılaımyn.

Eske salsaq, batysqazaqstandyq ǵalymdar kıik etinen shujyq jasap shyǵarǵan bolatyn.