Kıik eti kásiporyn qyzmetkerleriniń as mázirine engizilýi múmkin
ASTANA. KAZINFORM — Elimizde kıik etine degen suranys tómendegen. Osyǵan baılanysty Aýyl sharýashylyǵy mınıstrligi ony ótkizýdiń balama joldaryn qarastyryp jatyr. Sonyń biri — kıik etin memlekettik satyp alý aıasynda satyp alyp, kásiporyn qyzmetkerleriniń tamaqtaný ratsıonyna engizý.
Bul týraly Úkimettegi brıfıng barysynda jýrnalısterdiń saýalyna jaýap bergen Aýyl sharýashylyǵy vıtse-mınıstri Azat Sultanov málimdedi.
Onyń aıtýynsha, kıik etin óńdeıtin keıbir kásiporyndarda daıyn ónim jınalyp qalǵan. Sebebi óndiris kólemi tutynýshylar suranysynan asyp ketken.
— Bastapqy kezeńde kıik etinen daıyndalǵan konservilerge suranys joǵary boldy. Turǵyndar ónimdi kóbine jańalyq retinde satyp aldy. Qazir suranys tómendedi. Sonyń saldarynan kıik etin óńdeýge tartylǵan kásiporyndar ónimdi ótkizýde qıyndyq kórip otyr, — dedi vıtse-mınıstr.
Eksportqa salynǵan tyıym ónimniń ótimin tejep otyr. Vıtse-mınıstrdiń aıtýynsha, halyqaralyq uıymdardyń talabyna sáıkes, kıik pen odan alynatyn ónimderdi shetelge eksporttaýǵa ruqsat joq.
Vıtse-mınıstr óz sózinde kıik etin ótkizýdiń bir baǵytyn atady. Onyń aıtýynsha, bul — vahtalyq kezekte jumys isteıtin kásiporyndar men azyq-túlik ónimderin iri kólemde satyp alatyn uıymdardyń as mázirine kıik etin engizý.
— Qazir birneshe nusqa qarastyrylyp jatyr. Sonyń biri — kıik etin memlekettik satyp alýdyń jekelegen baǵyttarynda paıdalaný. Árıne, sanıtarlyq talaptar saqtalady. Sondyqtan bul ónim balalarǵa berilmeıdi, — dedi ol.
Bul máseleni Aýyl sharýashylyǵy mınıstrligi Ekologııa jáne tabıǵı resýrstar mınıstrligi, sondaı-aq Saýda jáne ıntegratsııa mınıstrligimen birlesip qarastyryp jatyr.
— Árıne, sanıtarlyq talaptar bar. Sondyqtan kıik eti balalarǵa berilmeıdi. Alaıda ony vahtalyq ádispen jumys isteıtin kásiporyndar men azyq-túlik jappaı satyp alynatyn uıymdardyń as mázirine engizýge bolady. Basqa et túrlerimen birge qoldanylsa, qaýipsiz. Qazir oǵan qatysty eshqandaı shekteý joq, — dedi Azat Sultanov.
Azat Sultanovtyń aıtýynsha, áskerı qyzmetshilerdiń kúndelikti as mázirine kıik eti engizilmeıdi.
— Áskerge 18 jastan asqan azamattar shaqyrylady. Jas aǵzaǵa dıetalyq etten góri qunarly taǵam kóbirek qajet. Al kıik eti — dıetalyq ónim, — dedi vıtse-mınıstr.
Sondaı-aq ol kıik etiniń adam densaýlyǵyna qaýipsiz ekenin de eske saldy.
— Óńdeý kásiporyndarynda veterınarııalyq mamandar jumys isteıdi. Kıik eti de, basqa et ónimderi de zerthanalyq baqylaýdan ótedi. Sondyqtan onyń qaýipsizdigine kúmándanýǵa negiz joq, — dedi ol.
Aıta keteıik, buǵan deıin kıik eti men onyń buqtyrylǵan etin qaıdan jáne qansha teńgege satyp alýǵa bolatynyn jazǵan edik.
