QIK BAQ ókilderi arasynda baıqaý jarııalady
ASTANA. QazAqparat - Qazaqstan ıpotekalyq kompanııasy (QIK) buqaralyq aqparat quraldary arasynda «Nurly jol baǵdarlamasy: Arendalyq turǵyn úı» respýblıkalyq konkýrsyn jarııalady. Bul týraly QR Ulttyq ekonomıka mınıstrliginiń baspasóz qyzmetinen habarlandy.
Konkýrs QIK memlekettik ınstıtýtynyń qoldaýymen arendalyq turǵyn úıge qatysty máselelerdi jan-jaqty jáne obektıvti túsindirýge BAQ nazaryn aýdarý, turǵyn úı máselelerine arnalǵan oqıǵalardy túsindiretin tilshiler men redaktsııa ujymdarynyń shyǵarmashylyq qyzmetin yntalandyrý maqsatynda ótkiziledi.
Konkýrsqa qatysýǵa 2016 jylǵy 1 qańtardan bastap 15 qarashaǵa deıin qosa alǵanda, baspa BAQ nemese ınternet-resýrstarda, tele- nemese radıoarnalarda jarııalanǵan nemese efırge shyqqan jumystar qabyldanady.
Konkýrsqa tikeleı jumystardyń avtorlary, shyǵarmashylyq uıymdar, baspa BAQ-nyń redaktsııalary, teleradıokompanııalar jáne uıymdastyrý-quqyqtyq formalaryna táýelsiz BAQ salasynda qyzmet etetin ózge de uıym ókilderi qatysa alady.
Konkýrstyq jumystar kelesi atalymdar boıynsha baǵalanady: úzdik telesıýjet, úzdik radıosıýjet (reportaj), úzdik baspa materıaly jáne úzdik ınternet-materıal. Konkýrs qorytyndysy boıynsha jeńimpazdarǵa qundy júldeler tabystalady.
Materıaldar Almaty qalasy Qarasaı batyr kóshesi, 98 (QIK), Astana qalasy Turan dańǵyly, 18 (Astana q. ókildigi) mekenjaılary boıynsha 2016 jylǵy 16 qarashaǵa deıin «Tilshiler konkýrsyna» belgisimen qabyldanady.
