Kıiz úı talaı sheteldik sáýletshilerdi tań qaldyrady - sheber

ShYMKENT. QazAqparat - Ońtústik Qazaqstan oblysy, Besketik eldi mekeniniń turǵyny Kópjan Torpıev bes jyldan beri qazaqtyń qara shańyraǵy - kıiz úı daıyndaýmen aınalysady. Kásipker halyqaralyq EKSPO kórmesiniń ótýine oraı jumys qarqynyn arttyrǵan, dep habarlaıdy QazAqparat HAA tilshisi.

Qazaqtyń qasıetti kıiz úıin álemge pash etý maqtaraldyq kásipker Kópjan Torpıevtiń kóp jyldan bergi armany. Búginde isker azamat aýyldaǵy sheberlerdiń tobyn quryp, qaıtalanbas órnegi bar kıiz úı jasaýda. Nátıjesinde kıeli shańyraqtyń ulttyq naqyshyna qaraı Qazaqstannyń túkpir-túkpirinen tapsyrystar túse bastaǵan. Aýyl turǵyny bul kásibinen kól-kósir paıda tappasa da, jurtshylyqtyń kıiz úıge degen qyzyǵýshylyǵynyń arta túskenine qýanyp otyr.

«Aldymen kıiz úıdiń zamanaýı bezendendirilýine den qoıdyq. Sáýlettik sáni kelisken aq kúmbezdi úıler búginde túrli oıýlarmen kómkerilýde. Aýyl ismerleri kıiz úıdiń baıyrǵy nusqasyn saqtaı otyryp, sáni men sapasyna erekshe kóńil aýdarady. Jalpy qazaqtyń kıiz úıi - erekshe geometrııalyq eseppen, asqan tapqyrlyqpen jasalynady. Osy ýaqytqa deıin jasaǵan kıiz úılerimiz talaı sheteldik sáýletshilerdi tań qaldyrdy», - deıdi Kópjan Torpıev.

Kásipker búginde Astana tórinde ótip jatqan halyqaralyq kórmege kelgen qonaqtar Maqtaraldaǵy Besketik aýylyna at basyn buryp jatsa deıdi. Sebebi olardyń kóńilderinen shyǵatyn dúnıeler munda jeterlik eken. Ulttyq ónerdiń shyn janashyry osylaısha týrısterdi Myrzashólge shaqyrady.