Kıiz úı ishindegi tuńǵysh eksperımentaldyq mýzykalyq qoıylym sátti ótti
NUR-SULTAN. QazAqparat - Elordalyq «Astana musical» teatrynyń repertýaryna taǵy bir keremet týyndy qosyldy. «Shańyraq» eksperımentaldyq mýzykalyq qoıylymynyń sátti ótken aldyn ala kórsetilimi talǵampaz kórermenniń oń baǵasyn alyp otyr, dep habarlaıdy QazAqparat tilshisi.
«Shańyraq» performansynyń aldyn ala kórsetilimi búgin «Qazaqstan» ortalyq kontsert zalynda arnaıy qoıylǵan úlken kıiz úıde ótti.
«Shańyraq» - bul jańa baǵyttaǵy eksperımentaldy mýzykalyq performans. Barlyq kórinister qazaq halqy úshin birliktiń sımvoly – kıiz úıdiń ishinde sahnalandy. Ártister men kórermender arasyndaǵy qashyqtyqtyń joqtyǵy, ýaqyt pen keńistik kókjıeginiń toǵysýy kıiz úıdegi erekshe atmosferany tolyqtaı sezinýge múmkindik berdi. Qoıylym ıdeıasy men sıýjeti búgingi tańda kókeıkesti ekendigin atap ótý kerek. «Shańyraq» performansynda Uly dala eliniń máńgilik qundylyqtary tamasha kórinis tapqan. Olar – ulttyq mýzykalyq óner, ejelden kele jatqan ádet-ǵuryptar, ýaqyt synynan ótken salt-dástúrler. Mýzykalyq spektakl adam ómiriniń tal besikten jer besikke deıingi sátterin qazaqtyń salt-dástúrlerimen sheber baılanystyryp kórsetildi. Keıipkerlerdiń ishki sezimderi mýzykalyq arııa, dýet, trıo, hor arqyly erekshe janrda jetkizildi. Sahnalyq qoıylymnyń ár kezeńi halyq ánderimen árlenip, mýzykalyq aspaptarmen súıemeldenip, zamanaýı horeografııamen úılesim tapty.
«Qazaqkontsert» memlekettik kontserttik uıymynyń dırektory Jeńis Seıdýllauly ult rýhanııatynyń jańǵyrýyna zor úles qosatyn qoıylym jóninde óz pikirin bildirdi.
«Qazaq halqy úshin shańyraq qasterli de qasıetti uǵym. Búgin talantty jastar «Shańyraq» týyndysyn sahnalap, qazaq mýzykalyq óneriniń qarashańyraǵy – Qazaqkontserttiń 60 jyldyq mereıtoıy men Jastar jyly aıasynda keremet tartý jasady. Ulttyq qundylyqtarymyzdy qadir tutqan ónerpaz jastar kópshilikke rýhanı azyq syılap, zaman kóshimen jalǵasyp búgingi kúnge jetken salt–dástúr, ádep–ǵuryptarymyzdyń qaıta jańǵyrýyna úles qosty», - dedi ol.
«Shańyraq» performansy «Astana mıýzıkl» teatrynyń kórkemdik jetekshisi Eslám Nurtazınniń rejısserligimen qoıyldy. Lıbretto avtory Ánnas Baǵdat, kompozıtory Bolatbek Nurqasymov bolsa, hormeısteri – Almat Ábishev.
Qoıylymnyń barsha kórermen qaýymǵa arnalǵan premerasy da dál osy jerde 5-6 qarasha kúnderi usynylady.
