Qıyr shyǵystaǵy úsh eldiń saýda mınıstrleriniń kezdesýi bes jyldan soń qaıta jańǵyrdy
ASTANA. KAZINFORM – Ońtústik Koreıa, Qytaı jáne Japonııa saýda mınıstrleriniń on úshinshi kezdesýi 30 naýryz kúni Seýlde ótti. Taraptar saýda-ekonomıkalyq yntymaqtastyqtyń qajettiligin atap ótip, ózara árekettestikti keńeıtýge kelisti. Bul týraly Yonhap agenttigi habarlady.
Kezdesýge Ońtústik Koreıanyń Saýda, ónerkásip jáne energetıka mınıstri An Dok Gyn, Qytaıdyń Saýda mınıstri Van Ventao jáne Japonııanyń Ekonomıka, saýda jáne ındýstrııa mınıstri Mýto Edzı qatysty.
Taraptar aımaqtyq jáne jahandyq ekonomıkalyq turaqtylyqty saqtaý jolynda úshjaqty yntymaqtastyqty nyǵaıtýdyń mańyzdylyǵyn atap kórsetip, saýda-ekonomıkalyq saladaǵy seriktestikti keńeıte túsýge kelisti. Sonymen qatar, mınıstrler jahandyq saýda, ónerkásip, energetıka jáne ózara yntymaqtastyq máseleleri jóninde pikir almasty.
Taraptar Dúnıejúzilik saýda uıymyn (DSU) reformalaý, «Óńirlik jan-jaqty ekonomıkalyq áriptestik kelisimine» (RCEP) jańa múshe qabyldaý sekildi kópjaqty saýda júıesi aıasyndaǵy yntymaqtastyqty nyǵaıtýǵa kelisti. Sondaı-aq, taraptar jan-jaqty ári «joǵary deńgeıli» Ońtústik Koreıa–Qytaı–Japonııa erkin saýda kelisimin (FTA) jasasý úshin birlesip jumys isteýge ýaǵdalasty. Buǵan qosa, mınıstrler bıznestiń damýyna qolaıly jaǵdaı jasaý, jetkizý tizbeginiń turaqtylyǵyn saqtaý, eksporttyq baqylaýǵa qatysty yntymaqtastyqty kúsheıtý, sondaı-aq jasyl jáne tsıfrlyq ekonomıkany damytý baǵytynda tyǵyz seriktestik ornatýǵa kelisti.
Kezdesý Tramp ákimshiliginiń saýda seriktesterine «ózara tarıfter» engizý týraly bastamasy kúshine enýdiń qarsańynda ótti. Kezdesýdiń basty maqsaty — ortaq múddelerge negizdelgen erkin saýda tártibin jetildirý úshin úsh eldiń tıisti synaqtarǵa qalaı jumyla qarsy turýy kerektigin talqylaý. Mınıstrler, jalpy alǵanda, halyqaralyq erejelerge negizdelgen jahandyq erkin saýda júıesi aıasynda turaqty saýda tártibin saqtap qalýǵa múddeli ekendikterin bildirdi.
Aıta keteıik, buǵan deıingi Koreıa, Qytaı jáne Japonııa saýda mınıstrleriniń kezdesýi 2019 jyldyń jeltoqsanynda Beıjińde ótken edi. Qytaı qoǵamdyq ǵylymdar akademııasynyń Japonııany zertteý ınstıtýtynyń (https://m.huanqiu.com/article/4M4uZ2eW8h4) aǵa ǵylymı qyzmetkeri Lý Haonyń aıtýynsha, ótken bes jarym jylda koronavırýs pandemııasynyń órshýi saldarynan Qytaı, Ońtústik Koreıa jáne Japonııa úshjaqty mehanızmi, is júzinde, úzilip qalǵan bolatyn. Sondaı-aq, Ońtústik Koreıa men Japonııanyń AQSh saıasatyn qoldap, Qytaıǵa qarsy áreket etýi, AQSh, Japonııa jáne Ońtústik Koreıa arasyndaǵy úshjaqty yntymaqtastyqtyń kúsheıýi Soltústik-Shyǵys Azııanyń qaýipsizdik jaǵdaıyn shıelenistirip jibergen edi. Buǵan qosa, Ońtústik Koreıa men Japonııanyń ishki saıasatyndaǵy ózgerister de úsh el arasyndaǵy yntymaqtastyqtyń toqyraýyna ákeldi.
- Deı turǵanmen, Donald Tramptyń jańa saıasaty AQSh-tyń Azııadaǵy basty odaqtastary — Japonııa men Ońtústik Koreıanyń alańdaýshylyǵyn kúsheıtti. AQSh tarapynan keletin qysymdy báseıtý úshin Seýl men Tokıo aımaqtyq yntymaqtastyqty qaıta jandandyryp, Qytaımen ózara baılanysyn jaqsartýy kerek, ózge jol joq, — dedi Lý Hao.
Aıta keteıik, buǵan deıin Sibir men Qıyr Shyǵysta 100-ge jýyq eldi meken tútinge tunshyǵyp otyrǵanyn jazǵanbyz.