«Qıyn qarsylas»: «Vıtorııa» fýtbol klýbynyń bapkeri «Astana» komandasynan qaýiptenedi

ASTANA. KAZINFORM — Portýgalııalyq «Vıtorııa» (Gımaraesh) komandasynyń bas bapkeri Rýı Borhes Konferentsııa lıgasynyń jalpy kezeńiniń tórtinshi týry aıasynda «Astanaǵa» qarsy oıyn aldyndaǵy baspasóz máslıhatyna qatysty. Bul týraly Sports.kz jazdy. 

«Uıqy men tamaqtyń durys bolýy — fýtbolshylar úshin óte mańyzdy. Sosyn bul jaqtyń jergilikti ýaqyty men klımatyna beıimdelýimiz kerek. Onyń ústine Almatyda qys qatty sýyq emes eken. Bul rette aıta keteıin, biz — úlken klýbtardyń birimiz. Sondyqtan erteńge oıynda jeńiske jetý úshin qolymyzdan kelgenniń bárin jasaımyz», - dedi jattyqtyrýshy. 

Sonymen qatar bas bapker Qazaqstanda ishki birinshiliktiń aıaqtalǵanyn, elordalyq klýbtyń bar kúshti Konferentsııa lıgasyna jumsaıtynyn atap ótti. 

«Astana» — qıyn qarsylas. Onymen qosa Qazaqstanda ishki chempıonat áldeqashan aıaqtaldy. Olar endi Konferentsııa lıgasynda kóp upaı alýdy kózdeıdi. Óıtkeni qazaqstyndyq klýbqa pleı-off kezeńine shyǵýǵa áli de múmkindik bar», - dedi Rýı Borhes. 

Aıta keteıik, «Astana» men portýgalııalyq «Vıtorııa» arasyndaǵy oıyn 28 qarasha kúni Almatydaǵy Ortalyq stadıonda ótedi.