Kıim dızaınerleriniń alǵashqy ulttyq baıqaýy ótedi

ASTANA. QazAqparat - Qazaqstanda tuńǵysh ret otandyq kıim dızaınerleriniń ulttyq baıqaýy ótedi, dep habarlaıdy QazAqparat tilshisi.

«Atameken» Ulttyq kásipkerler palatasy men Áıelder kásipkerligin qoldaý qory uıymdastyrǵan «ALTYN OIMAQ» baıqaýy básekege qabiletti otandyq brendterdi qalyptastyra alatyn kásibı dızaınerlerdiń jańa býynyn anyqtaýǵa múmkindik beredi.

«Atameken» palatasynan málim etkendeı, baıqaý alty nomınatsııa boıynsha ótedi:

- Ulttyq oıý-órnekpen kómkerilgen iskerlik kıimniń úzdik dızaıny;

- Ulttyq oıý-órnekpen kómkerilgen sporttyq kıimniń úzdik dızaıny;

- Ulttyq oıý-órnekpen kómkerilgen balalar kıiminiń úzdik dızaıny;

- Ulttyq oıý-órnekpen kómkerilgen úıge arnalǵan tekstıldiń úzdik dızaıny;

- Ulttyq oıý-órnekpen kómkerilgen akserssýardyń úzdik dızaıny;

- Sporttyq aıaq kıimniń úzdik custom-dızaıny;

Baıqaý úsh kezeńnen turady. Alǵashqy kezeńde ótinimder baıqaýdyń resmı saıtyna 2019 jyldyń 4 naýryzynan 15 mamyryna deıin qabyldanady. Ekinshi kezeńde úmitkerler qoǵamdyq onlaın-daýys berýge qatysady jáne úshinshi kezeńde Bas júlde ıegeri anyqtalady.

Eske salaıyq, Elbasy Nursultan Nazarbaev otandyq jeńil ónerkásip salasyn qoldaý qajettigi týraly birneshe márte aıtqan bolatyn. 2018 jyldyń 5 qazanyndaǵy Joldaýynda kıim tigetin qazaqstandyq kásiporyndarǵa kómek bildirýdi tapsyrdy.

Keıin, jeltoqsan aıynda ótken «Indýstrııalandyrýdyń ekinshi besjyldyǵy: Qazaqstanda jasalǵan» atty jalpyulttyq telekópir barysynda elimizde tigýge bolatyn kıim-keshek pen turmystyq zattardy ımporttap otyrǵanymyzǵa keıistik tanytty.

Bıylǵy 30 qańtarda Prezıdent Úkimet nazaryn otandyq kásipkerlerdiń ónimderine taǵy da aýdardy. Ásirese, Jastar jylynyń ashylýy kezinde uıymdastyrylǵan kórmedegi ónimderdiń sapaly ekenin atap ótti.