Kıiktiń múıizin zańsyz saqtaǵan eki atyraýlyq sottaldy
Atyraý qalasynyń №2 sotynda kıik múıizin zańsyz ıemdenip, saqtap, tasymaldaǵany úshin eki kúdiktige qylmystyq is qaraldy. Kúdiktilerge QR Qylmystyq kodekstiń 339-babynyń 3-bóliginiń 2-tarmaǵymen aıyp taǵylǵan.
«Bıylǵy 2 naýryzda K. jáne Z. óli kúıde jatqan kıikterdiń 2 myńnan astam múıizin kesip alǵan. Keıin K.-nyń Atyraý qalasyndaǵy turǵylyqty mekenjaıyna ákelip, zańsyz saqtaǵan. Al 4 naýryzda K.-nyń úıin tintý kezinde joǵaryda kórsetilgen kıik múıizderi tabylǵan. Kúdiktiler qylmystyq áreketterimen memleketke 6 mlrd teńgeden astam mólsherde asa iri zalal keltirgen», - dep №2 sottyń baspasóz qyzmeti.
Sottalýshylardyń kinási tintý hattamasymen, zattaı dáleldemelermen, beınejazbalarmen, sot-bıologııalyq jáne taýartaný saraptamalarynyń qorytyndylarymen dáleldengen.
Prokýror sottalýshy K.-ǵa 8 jyl, al, Z.-ǵa 7 jyl merzimge bas bostandyǵynan aıyrý jazasyn taǵaıyndaýdy suraǵan.
Sot K. jáne Z.-ny QR Qylmystyq kodeksiniń 339-babynyń 3-bóliginiń 2-tarmaǵymen kináli dep tanydy.
«K.-ǵa 7 jyl, Z.-ǵa 4 jyl merzimge bas bostandyǵynan aıyrý jazasy taǵaıyndaldy. Sottalýshylardan ortaq úleste memleket paıdasyna 6 mlrd teńgeden astam mólsherde zalal óndiriledi», - dep málim etti sottyń baspasóz qyzmeti.
Sot úkimi zańdy kúshine engen joq.
Eske sala ketelik, budan buryn Atyraýda turǵyn úıden 2,5 myńǵa jýyq aqbóken múıizi tárkilengenin jazǵan bolatynbyz.
