Kıikti zańsyz aýlaǵandar sottaldy
ASTANA. 1 tamyz. QazAqparat - Kıikterdi zańsyz aýlaǵany úshin Qyzylorda oblysy Josaly aýylynyń eki turǵyny 2 jyl 6 aı jáne 2 jylǵa sottaldy.
Bul týraly Aýyl sharýashylyǵy mınıstrliginiń baspasóz qyzmetinen habarlandy.
Mınıstrlik málimetterine qaraǵanda, jyl basynan beri kıikterdiń taralý aımaqtarynda olardy atýdyń jáne múıizderin saýda-sattyqqa salýdyń 19 faktisi tirkelgen. Kıiktiń 124 týshasy men 5249 múıizi tárkilengen. Munyń ózi brakonerliktiń jappaı sıpat alyp otyrǵanyna, kıik etin ótkizý, múıizderin satyp alýdy uıymdastyrýdyń jolǵa qoıylǵanyna, sondaı-aq ony elden tysqary jerlerge kontrabandalyq jolmen tasyp áketilýine naqty aıǵaq bola alady. Bul rette el ishinde kıik eti men múıizderin ótkizý naryǵynyń bolýy, olardy shetelge kontrabandalyq jolmen shyǵarýdyń oryn alýy, sondaı-aq ustalǵandardyń jaýaptylyqtan jaltaryp ketýi kıik basyn saqtaýǵa aıtarlyqtaı qater tóndirip otyr.
«Osyǵan oraı, Orman jáne ańshylyq sharýashylyǵy komıteti QR Іshki ister mınıstrligimen birlesip, Qylmystyq jáne ákimshilik quqyq buzýshylyq kodeksterine ózgerister engizgen bolatyn. Prezıdent qol qoıyp, kúshine engen zań janýarlar men ósimdikterdiń sırek kezdesetin jáne joıylyp ketý qaýpi tóngen túrlerin ǵana emes, sonymen birge paıdalanýǵa tıym salynǵan túrleri de zańsyz paıdalanǵany úshin jazalaýdy qarastyrǵan edi.
«Qatańdatylǵan zańǵa sáıkes, 2012 jylǵy brakonerliktiń jáne kıik múıizderiniń iri toptamalaryn tasýda tirkelgen faktileri boıynsha qylmystyq ister qozǵalyp, tergeý amaldary júrgizilýde. Osyndaı bir fakt boıynsha Qyzylorda oblysy Qarmaqshy aýdandyq sotynyń úkimimen aǵymdaǵy jyldyń sáýir aıynda kıikterdi zańsyz aýlaǵany úshin Qyzylorda oblysy Josaly aýylynyń eki turǵyny 2,6 jáne 2 jylǵa sottaldy. Buǵan qosa, zań buzýshylardyń «ÝAZ 34512» markili avtokóligi tárkilendi», - delingen baspasóz habarlamasynda.
