Kıikti qorlaýǵa qatysty vıdeo: Aqmola polıtsııasy isti toqtatty
KÓKShETAÝ. QazAqparat - Aqmola oblysynyń polıtseıleri Qorǵaljyn aýdanynda kıikterdi qorlaý oqıǵasyna baılanysty kúdiktilerdiń ústinen qozǵalǵan qylmystyq isti toqtatty, dep habarlaıdy QazAqparat tilshisi ІІD baspasóz qyzmetine silteme jasap.
«Іs qylmystyq aıǵaqtardyń bolmaýyna baılanysty toqtatyldy», - dep málim etti baspasóz qyzmetindegiler.
Eske sala keteıik, ótken jyldyń sońynda Feısbýk áleýmettik jelisinde vıdeo tarap, onda er adamdar kezekpen kıiktiń ústine minip, sýretke túsedi. Múıizinen ustap, joǵary kóteredi. Olardyń janynda kishkentaı bala da bar. Sondaı-aq beınejazbada kıikti ustaǵanǵa deıin ony kólikpen qýǵany túsirilgen.
Osyǵan baılanysty Qorǵaljyn memlekettik tabıǵatty qorǵaý qoryǵynyń dırektory atynan túsken aryz boıynsha sotaldy óndiristik is qozǵalǵan bolatyn.
