Kıikterge arnalǵan dáliz jasaldy - Búkilálemdik bank ókili Ato Braýn

ALMATY. QazAqparat - Búkilálemdik banktiń Qazaqstandaǵy turaqty ókili Ato Braýn «Azamattyq bastamalar -«Level Up!» damý draıveri» konferentsııasy barysynda Qazaqstanda jasalatyn ınfraqurylymdyq jobalardy júzege asyrýdaǵy azamattyq uıymdardyń belsendiligi týraly aıtty, dep habarlaıdy QazAqparat tilshisi.

Ato Braýnnyń aıtýynsha, Qazaqstanda júzege asyrýdy qajet etetin ınfraqurylymdyq jobalar kóp, ári olardy júzege asyrýda azamattyq qoǵamnyń belsendiligi zor ról oınamaq.

«Kez kelgen jobada sotsıýmnyń pikiri mańyzdy. Jol qurylysy, bilim berý jáne densaýlyq saqtaý salasyndaǵy jobalarda ekologııalyq jáne áleýmettik táýekelderdi baqylaımyz. Azamattar tarapynan aryz-shaǵym, men keri baılanysty eskeremiz. Bul jumys jobalardyń halyqqa paıdasy qanshalyqty ekenin bilýge jaqsy yqpal etedi», - dedi Ato Braýn.

Bank ókili mysal retinde Batys Eýropa - Batys Qytaı magıstraliniń qurylysyn keltirgen. Eýropa men Qytaıdy biriktiretin asa iri jobany júzege asyrýda Búkilálemdik bank ókilderi adamdarǵa qandaı yqpaly bolatynyn jan-jaqty zerttegen.

«Jol saldyq deıik. Onyń bireýge kesiri tımeı me? Kez-kelgen ózgeris adamdarǵa, jekelegen janýarlarǵa keri áser etpeýi tıis», - dedi Ato Braýn.

Onyń aıtýynsha, Almaty Qyzylorda jol qurylysy jobasyn qolǵa alǵan kezde túz janýarlarynyń da jaǵdaıyn eskergen. Atap aıtqanda, en dalada toqtaýsyz josıtyn bókenderdiń jaǵdaıy da nazarǵa alynǵan.

«Ekologııalyq uıymdar bizge aldyn ala eskertti. Joldyń keıbir tarmaqtary kıikterdiń kóshetin jerlerine týra keledi. Biz kıikterdiń joldaryna dáliz jasadyq. Eger, bul málimet eskerilmese, ekologııalyq jobaǵa tutas nuqsan keletin edi. Ár ÚEU óz salasyn jaqsy biledi. Sondyqtan, olarmen jumys jasaǵan óte durys», - dedi ol.

Búkilálemdik banktiń basty maqsaty ekonomıkalyq daǵdarys saldarynan japa shekkenderge kómek kórsetý.

Máselen, oqý bitirgen áli jumysqa turyp úlgermegen jastar qoldaýǵa muqtaj bolady. Olar túrli destrýktıvti aǵymdardyń yqpalyna erip ketýi múmkin. Osy oraıda banktiń bastamasymen Shveıtsarııa memleketi men QR Bilim jáne ǵylym mınıstrligi birige otyryp, jastarǵa keńes berý jobasyn qolǵa aldy. Bul jobaǵa qarjy qaıtarymsyz berilgen.

Qazir pılottyq joba 4 aımaqta júzege asyrylýda. Kelesi jyly barlyq aımaqtardy qamtıdy.