Kıikterdiń jappaı qyrylý sebepteri áli de anyqtalǵan joq - AShM
«Iá, pasterellez aýrýy tabyldy. Ol - fakt. Alaıda pasterelezdiń naqty sebepteri bolýy qajet. Biz sony bile almaı otyrmyz. Kıikterdiń ımmýnıtetin álsiretken ne? Ol aýrýǵa qarsy qorǵanysy qalaı buzyldy? Sebebi pasterellezdiń bakterııalary kıikterdiń aǵzasynda onsyz da bolady. Biraq sol bakterııalardyń ushyǵyp ketýiniń bir sebepteri bolýy kerek qoı. Biz Anglııa men Germanııanyń mamandaryn shaqyrdyq. Ókinishke qaraı, áli kúnge deıin naqty jaýap joq. Ǵalymdar da ózara daýlasyp, bir sheshimge kele almaı otyr», - dedi Nysanbaev búgin Astanada ótken baspasóz máslıxatynda.
Vıtse-mınıstrdiń sózine qaraǵanda, bireýler kıikterdiń qyrylýyn jańbyr kóp jaýǵannan keıin keneniń kóbeıip ketýinen kórse, endi bireýler janýarlardyń as qorytý júıesindegi aqaýlardan boldy dep sanaıdy. Osy ispetti birneshe boljamdar bar. Alaıda naqty sebepti eshkim anyqtaı almady.
Aıta keteıik, 2015 jyly Qostanaı, Aqtóbe men Aqmola oblystary aýmaǵynda kıikterdiń jappaı qyrylýy boldy. Sol kezde belgisiz aýrýdan 134 myń dala janýary mert boldy. 2014 jyldyń basynda olardyń sany 256,7 myń bas bolǵan. Vıtse-mınıstrdiń Erlan Nysanbaevtyń aıtýynsha, kıikter jappaı qyrylmaǵanda qazir olardyń sany 300 myńǵa jetetin edi.