Kıikterdiń atalyqtaryn qyrý saldarynan janýarlardyń ımmýndyq júıesi álsiregen - M.Eleýsizov

ASTANA. QazAqparat - Kıikterdiń sońǵy kezde indetten jappaı qyrylýyna ótken ǵasyrdyń 80-shi jyldarynan beri bul janýarlardyń ımmýndyq júıesiniń álsireýi sebep bolýy múmkin. Bul týraly búgin Astanada QR AShM janynda Betpaqdala popýlıatsııasyndaǵy kıikterdiń qyrylýyn anyqtaý boıynsha jumys tobynyń otyrysynda «Tabıǵat» ekologııalyq odaǵynyń basshysy Mels Eleýsizov málim etti.

«1980 jyldardan beri kıikterdiń atalyǵyn jappaı atý bastaldy. Osynyń barlyǵy sol kezde belgili boldy. Kıikterdiń múıizderin vagondap Qytaıǵa tasyǵan kezder oryn aldy. Atap aıtqanda, eń iri jáne eń jaqsy atalyqtaryn qyrdy. Osynyń saldarynan kıikterdiń ımmýndyq júıesi buzyldy degen oı týyndaıdy», - dep toqtaldy ol. Onyń paıymynsha, bul janýarlardyń ımmýndyq júıesiniń álsireýinen olar kez kelgen vırýstan, tabıǵattyń áserinen jappaı qyrylýy múmkin. «Elimizdegi ǵalymdar men sarapshylar kıikterdiń qyrylýyna qatysty ózinshe paıym jasap, ortaq naqty sebepteri men saldaryn jarııa ete almaı otyr», - dedi M.Eleýsizov.