«Kıikterdi qyryp jatqan kimder?»-respýblıkalyq basylymdarǵa sholý
***
«Egemen Qazaqstan» basylymynyń búgingi sanynda «Kıikterdi qyryp jatqan kimder?» degen taqyryppen maqala jarııalandy. Maqalaǵa mynadaı oqıǵa arqaý bolǵan. «Jaqynda oblystyq orman jáne ańshylyq sharýashylyǵy aýmaqtyq ınspektsııasyna Jangeldın aýdanyndaǵy «Aqqum-Altybaı-Saǵa» ań sharýashylyǵynyń dırektory Qaırat Ordabaevtan dabyl tústi. Ol Aqkólden otyz shaqty shaqyrym jerden 53 aqbókenniń óleksesin taýyp alǵanyn habarlady. Torǵaı dalasyna jedel attanǵan quramynda polıtsııa ókilderi men ınspektsııa qyzmetkerleri bar top máshıne izin kese otyryp, aınalasy bir aptanyń ishinde atylǵan taǵy da 32 kıikti tapty. Brokonerler jaıratyp salǵan 85 kıiktiń ekeýi eshki, tórteýi bir jasar laq, qalǵan 79-y tekesi. Sýyq qoldy ańshylar tekelerdiń múıizin aramen túbinen qyrqyp alǵan»,- delingen maqalada. Oqıǵanyń ári qalaı qalaısha órbigendigin «Egemen Qazaqstannyń» búgingi sanynan bile alasyzdar.
Sondaı-aq atalmysh basylymda «Betburys belesteri» atty maqala jaryq kórdi. «Óskemennen taıaq tastam jerde Ulan aýdanynyń ortalyǵy - Molodejnoe degen kent bar. Ótken jyldyń jazynda halyq qalaýlylary - máslıhat depýtattarynyń sheshimimen kentke osy jerdiń dańqty túlegi, partızan-jazýshy Qasym Qaısenovtiń esimi berilgen. Alaıda, nege ekeni belgisiz, atalǵan kent áli kúnge sol burynǵy oryssha ataýymen atalyp júr. Kim bilsin, aýdannyń jańa ataýyna qarsy shyqqan óz qandastarymyz da ber dep estidik, solardyń kesiri tıdi me eken?»,-delingen maqalada.
***
«Aıqyn» gazetiniń búgingi sanynda «Toqyldaq» saıt paıda boldy» degen taqyryppen maqala basyldy Onda budan bylaı joǵary oqý oryndaryndaǵy oqytýshylardyń stýdentterden para alýy qıyndaıtyndyǵy aıtylady. «Óıtkeni stýdentterden aqsha jınaıtyn muǵalimderdiń qara tizimin jurtqa jarııa etetin ǵalamtorda jańadan www.vzyatochnik.info degen «toqyldaq» saıt paıda boldy. Bul saıtqa kez kelgen adam para alý jónindegi faktini jazyp, ilip qoıýyna bolady. Saıttyń quryltaıshysy ózin mr. Іncognito dep atapty. Ol anonımniń aty-jóni men qupııalylyqty saqtaýǵa kepildik berip otyr. Sondaı-aq bul saıtqa resmı organdardyń eshqandaı qatysy joq», - delingen maqalada.
«Jańa qazaq ultynyń qalyptasýyna jańa sana jáne qoǵamdyq belsendilik kerek». «Aıqyn» gazetiniń dástúrli «Aq sóıle» aıdary aıasynda fılosofııa ǵylymynyń doktory, ál-Farabı atyndaǵy Qazaq ulttyq ýnıversıtetiniń professory Jaqan Moldabekovten alynǵan suhbat osyndaı taqyryppen berilip otyr. «Biz jańa dáýirge bet aldyq. Jańa qazaq ulty qalyptasyp keledi. Bolashaǵymyz qalaı bolaryn boljaı alasyz ba?», - degensaýalǵa J. Moldabekov: «Jańa qazaq ultynyń qalyptasýyna jańa sana jáne qoǵamdyq belsendilik kerek. Ol týraly Prezıdentimiz usynǵan "Qazaqstan - 2030", "Qazaqstan damýynyń 2020 strategııalyq baǵdary" qujattarynda anyqtalynǵan. Memlekettik saıasat osy baǵytta keshendi de qarqyndy is-sharalardy júzege asyrýda. Halqymyzdyń óskeleń rýhanı-mádenı suranysyn qanaǵattandyrýǵa - "Mádenı mura" baǵdarlamasy arnaldy. Baǵdar - qazaqtyń salt-dástúrin zerdeleýdiń bastaýy jáne elimizdiń rýhanı túleýiniń jalǵasy. Onyń basty maqsaty - Prezıdentimiz Nursultan Nazarbaevtyń sózimen aıtqanda, "ulttyń bet-beınesi, rýhanı bolmysy, jany, aqyl-oıy, parasaty" bolatyn mádenıetti ashyp berý, ultymyzdyń mádenıetin, onyń tarıhyn ulyqtaǵan uly tulǵalardyń úlesin tanytatyn mádenı murany saqtaýdy, qazaqstandyqtardyń rýhanı kemeldenýiniń órkenıet kóshinen keıin qalmaýyn qamtamasyz etý», - dep jaýap qatqan.
***
«Alash aınasy» basylymy búgingi sanynda «Mysyrdaǵy turaqsyzdyq qalaı sheshilmek?» atty maqala jarııalap, qańtardyń 25-inen beri qaqtyǵystan kóz ashpaǵan Mysyr elindegi jaǵdaıǵa qysqasha saraptama jasaǵan. Maqala avtorynyń paıymdaýynsha, Mysyrdaǵy jaǵdaı qazir birshama turaqtanyp kele jatqan sııaqty. Buǵan, eń aldymen, Hosnı Múbáraktyń eldegi túrli saıası kúshtermen dıalogqa barýy sebep bolyp otyr. Keshe Kaırdegi bankter óz jumysyn qaıta jalǵastyryp, kóshe-kóshemen kólikter júrip, qaıtadan tirshiliktiń nyshany baıqala bastady. Degenmen narazylyq bildirýshi halyq Tahrır alańynan áli taraǵan joq. Sondaı - aq maqalada Mysyrdaǵy búliktiń birqatar elderge áser etip jatqandyǵy aıtylady. Mysaly sol aımaqtaǵy eń zaıyrly ustanymdy Túrkııanyń ózinde 10 shaqty jerde myń adamnyń basyn jınaǵan sherýler kórinis berip jatyr.
Sondaı-aq atalmysh basylymnyń búgingi sanynda «Qaısarovtyń qazaq tiline qaıraty jetpedi» atty maqala jarııalandy. «Keshe Ortalyq saılaý komıssııasynda 2011 jylǵy 3 sáýirge belgilengen QR Prezıdentiniń kezekten tys saılaýyna kandıdat bolyp tirkelgen Ýálıhan Qaısarov memlekettik tildi erkin meńgergendigin anyqtaý jónindegi lıngvıstıkalyq komıssııanyń synynan súrindi. Eki saǵatqa jýyq ýaqyt boıy til-ádebıet salasynyń mamandary úmitkerdiń qazaq tilinen synaq alyp, ana tilin erkin meńgergendigin anyqtaýǵa kirip edi. Lıngvıstıkalyq komıssııanyń sheshimine sáıkes, Prezıdent saılaýyna úmitker «memlekettik tildi erkin meńgermegen» bolyp shyqty», - delingen maqalada.
***
«Kazahstanskaıa pravda» basylymynyń jazýynsha, Astana qalalyq ákimdiginde eletrondy memlekettik qyzmet kórsetýshi veb-portal jumysyn bastady. Qala turǵyndary eńbekpen qamtý, bilim berý, jer qatynastary, turǵyn úı sııaqty kúndelikti ómirdegi eń qajetti degen 15 sala boıynsha atalmysh qurylǵynyń qyzmetin paıdalana alady. Bul qyzmettiń jumysy jóninde keńirek bilgińiz «Akımat gorodskoı, elektronnyı» degen taqyryppen berilgen maqalany qarańyz.
