Kıikter taǵy bir vırýstan qyrylýy ábden múmkin - akademık
ASTANA. QazAqparat - Bıologııalyq qaýipsizdik máselelerin ǵylymı-zertteý ınstıtýtynyń málimetine sáıkes, aǵymdaǵy jyldyń sońǵy segiz aıynda Qazaqstan terrıtorııasynda 13 indetti aýrýlardyń 96 oshaǵy tirkelgen. Sondaı-aq, jabaıy janýarlar men qustardyń arasynda qutyrma, qý bezgegi, Batys Nil bezgegi, Nıýkasl aýrýy jáne qus tumaýy qozdyrǵyshtary taralyp otyr. Al kıikter arasynda jańa vırýs tabyldy, dep habarlaıdy QazAqparat tilshisi.
«Sońǵy jyldary respýblıkada faýnaǵa qaýip tóndirip otyrǵan jańa ekzotıkalyq aýrýlardyń taralýy tirkelip otyr. Máselen, eki jyl buryn Jambyl oblysynda, byltyr Qyzylorda oblysynda usaq maldyń arasynda oba aýrýy da tarady. Atalǵan aýrý ýshyǵyp, qos tuıaqty jabaıy janýarlarǵa aýysýy ábden múmkin. Aǵymdaǵy jyly Atyraý oblysynda iri qara mal nodýlıarly dermotıtten qyryldy. Bul aýrý maldan malǵa, sondaı-aq shybyn-shirkeı arqyly taralady», - deıdi akademık Abylaı Sansyzbaı.
Ǵalymnyń aıtýynsha, bıologııalyq qaýipsizdik máselelerin ǵylymı-zertteý ınstıtýtynyń mamandary kıikterdiń arasynda jańa vırýstyń taralyp jatqanyn anyqtady. «Jańa vırýstyń ataýy - Akabane. Osy ýaqytqa deıin atalǵan vırýs Qazaqstannyń terrıtorııasynda bolmaǵan. Ǵalymdar kıikterdiń 12 paıyzynda Akabane vırýsyn taýyp aldy. «Bul aýrýdyń ýshyǵyp ketýi kıikter sanynyń kúrt qysqarýyna ákelip soqtyrýy ábden múmkin. Sondyqtan qazirden bastap tıisti sharalardy qolǵa alý qajet», - deıdi akademık Sansyzbaı.
Aıta keteıik, aýyl sharýashylyǵy mınıstrliginiń málimetine sáıkes, buǵan deıin Qazaqstandaǵy kıikterdiń sany 21 myńnan 295 myń basqa deıin ósken bolatyn. Alaıda ótken jyly atalǵan jabaıy janýarlarlyń jappaı qyrylýynan keıin olardyń sany kúrt tómendep, 108 myńǵa deıin azaıǵan. Sol kezde ǵalymdar kıikter basym bóligi pasterellezden qyryldy degen qorytyndyǵa keldi.
