Kıikter qyrylǵan aýmaqtarda pastrellezdyń basqa da janýarlarǵa juqqany baıqalmady - AShM

Esterińizge sala keteıik, Batys Qazaqstan oblysynda 3 myń 271 bas kıiktiń qyrylǵanyn jáne olarǵa pastrellez dıagnozy qoıylǵanyn QazAqparat buǵan deıin habarlaǵan bolatyn.

«Qyrylǵan kıikterdiń basym bóligi, shamamen alǵanda 90 paıyzy urǵashy janýarlar bolyp otyr, olardyń ishinde laqtary bar. Pastrellezdy taratýshylar da osy analyqtar bolýy múmkin, óıtkeni qystan álsirep shyqqandyqtan, onyń ústine ishinde tóli bolǵandyqtan olar jańaǵydaı aýrýdy tez juqtyrady», dedi Aýyl sharýashylyǵy mınıstrligi Orman jáne ań sharýashylyǵy komıteti tóraǵasynyń orynbasary Qaıyrbek Musabaev. Onyń aıtýynsha, Batys Qazaqstan oblysynda qyrylǵan kıikter tek belgili bir aýmaqtarda (Jánbek aýdanynyń 4,5 myń gektar aýmaǵy -Jaqsybaı aýyldyq okrýginiń Aıdarly, Jumash jáne Borsy aýyldyq okrýginiń Vyshka, Qaıdar, Shalash eldi mekenderi) ǵana shoǵyrlanǵan bolyp otyr. Basqa aımaqtarda janýarlardyń jappaı ólýi nemese olardan sondaı aýrý belgileri baıqalmaıdy.

«Búgingi málimetter boıynsha basqa ańdarǵa, sondaı-aq aýrý taralǵan jerdegi jurttyń qolyndaǵy malǵa pastrellez aýrýynyń juqqandyǵy týraly faktiler bolǵan joq. Degenmen, bunyń juǵýy múmkin bolǵandyqtan, jergilikti atqarýshy organ arqyly sol aýmaqtarǵa shekteýler qoıyldy. Eldiń qolyndaǵy úı janýarlaryn vaktsınatsııalaý júrgizilip jatyr», dedi jýrnalısterge bergen suhbatynda Agroónerkásip keshenindegi Memlekettik ınspektsııa komıteti tóraǵasynyń orynbasary Ahmetjan Sultanov.