«Kıik tolǵaýy» mýltfılmi halyqaralyq kınofestıvalǵa qatysady
ALMATY. Qazannyń 27-si. QazAqparat /Ernar Beken/ - Qazaqstandyq «Kıik tolǵaýy» mýltfılmi Reseıdiń Sankt-Peterbor qalasynda ótetin «Jasyl kózqaras» halyqaralyq ekologııalyq fılmder festıvaline qatyspaq,
dep habarlaıdy QazAqparat.
Qarashanyń 23-27-si aralyǵynda ótkiziletin atalmysh festıvalde baǵyn synaıtyn týyndyny Seimar Social Fund qaıyrymdylyq qorynyń qarjylyq qoldaý kórsetýimen Shymkent qalasynyń «Anımaster» stýdııasy shyǵarǵan.
«Janýarlar týraly osyndaı formada baıandaý balalardyń boıyna meıirimdilik, janashyrlyq sezimderin uıalatady. Osy shyǵarmada jaqsylyq pen jamandyqtyń shekarasy aıqyn bederlengen. Mýltfılmdi kórgen bala erteń óskende kıik pen basqa da janýarlarǵa qol kótermeı ótetinine úmit artamyz», deıdi fılmniń rejısseri Maqsut Járimbetov.
Bıyldyń ózinde osy týyndy taǵy bir festıvalge qatysyp úlgergen bolatyn. Maýsym aıynda Hanty-Mansıısk qalasynda ótken «Qutqarý jáne qorǵaý» halyqaralyq ekologııalyq televızııalyq festıvalinen «Kıik tolǵaýy» mýltfılmi «Balalar men jasóspirimderge arnalǵan baǵdarlama» atalymy boıynsha eń úzdik dep tanyldy.
«Kıik tolǵaýy» 2006 jyly jaryq kórdi. Stsenarııin jazǵan - Tatıana Járimbetova, rejısseri - Maqsut Járimbetov, prodıýseri - Martın Lenk. Jalpy «Anımaster» stýdııasy 2004 jyldan beri «Aldar kóse men shaıtandar» mýltfılmin jáne «Saqaýlar shoýy», «Balalar Konstıtýtsııasy» mýltıplıkatsııalyq serıaldaryn kórermen nazaryna usyndy.
