Kıik máselesinde usynystar bolsa, birlesip qaraýǵa daıynbyz – Ekologııa mınıstri

ORAL. QazAqparat – Kıik máselesi boıynsha naqty usynystar bolsa, birlesip qaraýǵa daıynbyz. Bul týraly Batys Qazaqstan oblysynyń turǵyndarymen kezdesken Ekologııa, geologııa jáne tabıǵı resýrstar mınıstri Serikqalı Brekeshov málim etti, dep habarlaıdy QazAqparat tilshisi.

Mınıstr óz sózinde Batys Qazaqstan oblysy boıynsha ekologııa, geologııa, sý resýrstary, orman jáne balyq sharýashylyǵy salalarynyń damýyna toqtalyp ótti.

Sonymen qatar Qazaqstan aýmaǵyn álemdegi kıiktiń 95 paıyzdan astamy mekendeıtinin atap ótti. Bıyl olardyń sany 1 mln 318 myńǵa jetse, sonyń 801 myńy Oral popýlıatsııasyna tıesili.

Kıik jaıylatyn jerlerdi saqtaý maqsatynda bıyl oblys aýmaǵynda «Bókeıorda» tabıǵı rezervaty (343 myń gektar) jáge Aşyózek tabıǵı qaýmaly (314,5 myń gektar) quryldy.

«Mınıstrlikke Batys Qazaqstan oblysy fermerlerinen kıik sanynyń ósýine baılanysty jaıylymdyq, shabyndyq jáne egistik jerleriniń joıylyp jatqany jóninde shaǵym kóptep túsýde. Kıik ósimin, taralý aýmaǵyn, azyqtyq bazasyn anyqtaý jáne usynystardy ázirleý maqsatynda Aýyl sharýashylyǵy mınıstrligi 2023-2025 jyldary keshendi ǵylymı zertteý jumystaryn júrgizýdi josparlap otyr», - dedi S.Brekeshov.

Osyǵan oraı «Jaıyq Press» JShS bas dırektory Tabylǵalı Saparov kıik máselesin sheshý úshin onyń órisin keńeıtý, Jaıyq sýyn paıdalaný jónindegi oılaryn aıtsa, professor, aýyl sharýashylyǵy ǵylymdarynyń doktory Qazybaı Bozymov batysqazaqstandyq JOO-lardyń kóp jylǵy zertteýlerine súıený kerektigin jetkizdi.

Q.Bozymovtyń sózine qaraǵanda, kıikti kóktemde emes, kúz aıynda, qyrkúıek aıynyń basynda sanaý kerek. Sonda kıik sanyn dál anyqtaýǵa bolar edi. Qazir kıik 801 myń emes, 1 mln 200 myńǵa jetip qaldy deýge bolady.

Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń rektory Asqar Nametov kıikti arnaıy pıtomnık quryp, zertteýdi usyndy. Sonda qazirgideı, 200 emes, 200 myń bas kıikti ustaýǵa bolady.

Veterınarııa ǵylymynyń doktory Ǵaısa Ábsatyrov kıikten asa qaýipti juqpaly aýrýlardyń taralatynyna nazar aýdardy.

«Ekoklab» JShS basshysy Baýyrjan Sabanov, «Qoshpan» sharýa qojalyǵynyń jetekshisi Aıdyn Súndetov kıiktiń orasan zor zııan keltirip otyrǵanyn aıtyp, sharýalar múddesin qorǵaý, osyǵan baılanysty sýbsıdııa tóleý máselesin kóterdi. Kıik sanyn retteýdi aldaǵy jyldarǵa ysyra bermeı, kesheýildetpeı sheshý qajettigin aıtty.

Ekologııa mınıstri arnaıy baǵdarlama jasaýǵa qarsy emestigin, buǵan batysqazaqstandyqtardyń da atsalysýy qajettigin jetkizdi.

Batys Qazaqstan oblysynyń ákimi Ǵalı Esqalıev komıssııa qurylǵan jaǵdaıda óńirden ǵalymdardyń, ekologtardyń kiretinin atap ótti.

S.Brekeshov oblysqa sapary barysynda Kırov-Shejin kanalynyń qurylysymen de tanysty.

Foto : gov.kz