Kıik kúıleý maýsymyna júrgizilgen monıtorıng jumysy aıaqtaldy

NUR-SULTAN. QazAqparat – Qazaqstanda kıikterdiń kúıleý maýsymyna júrgizilgen monıtorıng jumysy aıaqtaldy. Monıtorıng jasy ortasha kıikterdiń quramyn anyqtaý úshin júrgiziledi, sebebi dál sol sanattaǵy kıikter túz taǵysynyń popýlıatsııasyn aıqyndaıdy, dep habarlaıdy QazAqparat tilshisi Qazaqstannyń bıoalýandyqty saqtaý qaýymdastyǵynyń Facebook paraqshasyna silteme jasap.

Monıtorıng jumysy jeltoqsannyń 10 men 21 aralyǵynda Aqtóbe, Qostanaı, Batys Qazaqstan oblystarynda júrgizilgen. Kıiktiń 88 myńy kezdesip, onyń ishinde jasy ortasha quramy 31 784 ekeni anyqtalǵan.

«Jynysjasty atalyqtardyń quramy 2020 jyly (2019 jylǵy kórsetkish jaqsha ishinde kórsetilgen) – oraldyq popýlıatsııada 1:6 (1:15), betpaqdalalyq popýlıatsııada 1:8 (1:10), ústirttik popýlıatsııada 1:11 (1:5) kórsetti. Ótken jylmen salystyrǵanda jynystyq turǵyda ústirttik popýltsııany eseptemegende oń dınamıka baıqalady. Buǵan ótken jyly esep kesh júrgizilgeni sebep bolyp otyr» delingen habarlamada.

Monıtorıng jumysyna Qazaqstannyń bıoalýandyqty saqtaý qaýymdastyǵy mamandarymen qatar, «Ohotzooprom» qyzmetkerleri, Yrǵyz-Torǵaı rezervaty men oblystyq orman sharýashylyǵy men janýarlar álemi basqarmalarynyń aýmaqtyq ınspektsııalary atsalysqan.