Kıik atqandar: Qyzylordada kóligin tastap qashqan brakonerdiń biri ustaldy

QYZYLORDA. QazAqparat - Qyzylordada aýdarylyp qalǵan kóligin tastap polıtseılerden qashqan kúdiktiniń biri ustaldy. Kólikten múıizi kesilgen 54 kıik tabylǵan, dep habarlaıdy QazAqparat tilshisi.

Esterińizge sala ketelik, atalǵan oqıǵa 11 sáýirde bolǵan edi. Sol kúni Qyzylorda qalalyq polıtsııa basqarmasy Aqsaı polıtsııa bóliminiń kezekshi bólimine «Ohotzooprom» ÓBRM qazynalyq kásipornynyń ınspektorynan habar kelip tústi. Onda reıd barysynda Dosan aýylynyń tusynda eki avtokóliktiń qoıylǵan blok beketti aınalyp ótkeni jóninde aıtylǵan.

«Ohotzooprom» qyzmetkerlerin baıqaǵan júrgizýshiler olardan qashyp qutylýǵa áreket etken. Sol sátte «Toyota Land Cruiser» markaly kólik sol mańdaǵy kanalǵa aýdarylyp qalǵan. Al kúdiktiler ekinshi kólikpen qashyp úlgeredi.

Oqıǵa ornyna Qyzylorda qalalyq Polıtsııa basqarmasyna qarasty Aqsaı polıtsııa bóliminiń jedel-tergeý toby bardy. Avtokólikti tekserý barysynda múıizi kesilgen 54 kıik pen 224 dana kıiktiń múıizi, 1 uńǵyly MR-155 markaly ańshy myltyǵy, patrondar, pyshaq jáne dúrbi tabyldy. Kóp uzamaı polıtsııa qyzmetkerleri kúdiktilerdiń birin ustady.

«Ol ýaqytsha ustaý abaqtysyna qamaldy. Kúdikti 34 jastaǵy jumyssyz oblys ortalyǵynyń turǵyny bolyp shyqty. Qazirgi tańda atalǵan derek boıynsha QR Qylmystyq kodeksiniń 339-baby 3-bóligi 2-tarmaǵy boıynsha sotqa deıingi tergep-tekserý amaly júrgizilýde.​ Osy qylmysqa qatysy bar kúdiktiler izdestirilýde», - dep málim etti Qyzylorda oblystyq polıtsııa departamentiniń baspasóz qyzmeti.