Kıik, arqar etin qoıdiki dep kórsetetin faktiler kóp - AShM
Orman sharýashylyǵy jáne janýarlar dúnıesi komıtetiniń tóraǵasy Qaıyr Ryskeldınovtyń aıtýynsha, saraptama jasaý kezinde kıik nemese arqar sııaqty sırek kezedesetin janýarlardyń etin qoı eti dep kórsetý faktileri az emes. Al tárkilengen ólikterdiń sany ádeıi azaıtyp jazylady.
«Búginde osy salada saraptama jasaıtyn mekemeler kóp. Arnaıy kýálikti alady da, saraptama jasaı beredi. Máselen, osydan úsh jyl buryn «Oxotzooprom»-nyń ınspektorlary N.Sh.Kishkentaev degen azamaty ustady. Onyń kóligin tekserý kezinde terisi sypyrylǵan arqardyń ushasy tabyldy. Atalǵan fakt boıynsha Qaraǵandy oblysy Aqtoǵaı aýdanynyń ishki ister bólimi qylmystyq is qozǵady. Al saraptama qorytyndysynda arqardyń ushasy "úı janýary" bolyp shyqty. Ol saraptamany jeke kásipker S.Z.Kópbaev ótkizdi. Onyń jazyp bergen qorytyndysy negizinde qylmystyq is toqtatyldy», - dedi Q.Ryskeldınov Parlament Májilisinde ótken dóńgelek ústel otyrysynda.
Jeke kásipker Kópbaevtyń zańsyz áreketteri onymen shektelmeıdi. Qaraǵandy oblysynyń Nura aýdandyq ishki ister bólimi J.K.Nurtaevqa qatysty qylmystyq isti qozǵaǵan bolatyn. Onyń jeke kóliginen kıiktiń 38 múıizi tabyldy.
«Osy qylmystyq is boıynsha saraptamany da jeke kásipker S.Z.Kópbaev júrgizgen. Qolda bar málimetterge sáıkes, tergeý kezinde 38 múıizdiń bári zym-zııa joq bolyp ketken. Ony sarapshy Kópbaevtyń ózi joǵaltty dep ashyq kórsetilgen. Qaraǵandy oblysynyń Nura aýdandyq ishki ister bólimi Kópbaevqa qatysty qylmystyq is qozǵady. Biraq artynan ol is toqtatyldy», - dep atap kórsetti Q.Ryskeldınov.
Resmı málimetke sáıkes, brakonerlerge qatysty qylmystyq isterdiń 41 protsenti ǵana sotqa túsip jatady. Al túrmege qamalǵandardyń sany nebári 9,5 protsentti quraıdy. Bes jyldyń ishinde brakonerlerge tıesili 379 kólik quralynyń 37-si ǵana tárkilendi.