«Kıik» aktsııasy nátıjesinde 17 qylmystyq is qozǵaldy – mınıstrlik

NUR-SULTAN. QazAqparat - Qazaqstanda ótken jyldyń 1-31 jeltoqsany aralyǵynda ótkizilgen «Kıik» keń aýqymdy aktsııasy barysynda 17 qylmystyq is qozǵaldy, dep habarlaıdy QazAqparat.

QR Ekologııa, geologııa jáne tabıǵı resýrstar mınıstrliginen málim etkendeı, «Ohotzooprom ÓB» RMQK ınspektorlary anyqtaǵan 17 qylmystyq quqyq buzýshylyqtyń 14-i kıik derıvattaryn zańsyz qoldaný, 3-eýi sırek kezdesetin janýarlar (arqar, qaraquıryq) túriniń zańsyz aýlaýǵa qatysty boldy.

Eske salsaq, QR Qylmystyq kodeksiniń 339-baby boıynsha («Sırek kezdesetin jáne joıylyp ketý qaýpi tóngen, sondaı-aq paıdalanýǵa tyıym salynǵan ósimdikter men janýarlar túrlerin, olardyń bólikterin nemese derıvattaryn zańsyz paıdalaný») 3 jyldan 7 jylǵa deıingi merzimge bas bostandyǵynan aıyrý jazasy qarastyrylǵan.

«Brakonerlik jasaý nemese ony josparlaý faktisi týraly QR Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń 87776785252 shuǵyl nómirine habarlasýdy suraımyz», - dedi mınıstrlikten.

«Kıik» aktsııasy – aqbókenderdiń brakonerligine, olardyń derıvattaryn satýǵa mamandanǵan uıymdasqan qylmystyq toptardyń qyzmetin anyqtaý jáne jolyn kesý jumystaryn kúsheıtý maqsatyndaǵy dástúrli shara.